Namaligya'g smuggled nga sigarilyo

CEBU, Philippines — Nasikop sa kapolisan ang usa ka lalaki nga gituohang distributor sa smuggled nga mga sigarilyo samtang nasakmit ang kapin P500,000 nga kantidad sa mga sigarilyo atol sa entrapment operation sa Barangay Kaongkod, lungsod sa Madridejos, Sugbo, sayong kabuntagon niadtong Martes, Agosto 4.

Ang operasyon gihimo sa hiniusang pwersa sa Madridejos Municipal Police Station ug Provincial Intelligence Unit sa Cebu Police Provincial Office (PIU-CPPO), human sa intelligence operation batok sa giingong pagbaligya ug pag-apod-apod sa mga sigarilyo nga walay graphic health warnings, tax stamps ug uban pang mandatory markings ubos sa Republic Act No. 10643 o ang Graphic Health Warnings Law. Nasikop ang suspetsado human kini nakabaligya og usa ka ream sa maong mga sigarilyo ngadto sa usa ka poseur-buyer.

Nasakmit gikan sa suspetsado ang gimarkahang P1,000 buy-bust money, usa ka ream sa mga sigarilyong gibaligya sa poseur-buyer, siyam ka master cases nga adunay 225 ka ream sa nagkalainlaing klase sa sigarilyo, ug usa pa ka master case nga adunay 24 ka ream sa United cigarettes, nga gituohang andam nang ipangbaligya. Nasuta sa kapolisan nga ang mga sigarilyo gikuha sa suspetsado gikan sa laing supplier nga padayun pa nilang giila karon.

Matud sa kapolisan, ang maong mga sigarilyo gipangapud-apod ngadto sa nagkalainlaing sari-sari store sa pipila ka barangay sa lungsod sa Madridejos.

Ang suspetsado nagpabilin sa kustodiya sa kapolisan samtang giandam ang  kasong ipasaka batok kaniya.

Giawhag sa CPPO ang publiko nga i-report sa kapolisan ang mga ilegal nga kalihokan nga makadaot sa kaluwasan sa publiko ug sa ekonomiya sa nasud.— IBM BANAT NEWS