Cebu Greats impresibong namawi sa MPBL

CEBU, Philippines — Ang Cebu Greats namawi sa duha ka sagunson nilang pildi sa ilang korte ug gipahimungtan sa ilang kapungot ang Pasig City, 108-86, sa SportsPlus Maharlika Pilipinas Basketball League (MPBL) Season 8 niadtong Sabado, Hulyo 25, didto sa Orion Sports Complex sa Bataan.

Si Alvin Baetiong mikadlit og career-high 23 puntos uban ang pito ka rebounds ug usa ka assist sud lamang sa 18 minutos sa dihang ang Greats milayat sa ikatulong dapit sa South Division bitbit ang 15-5 win-loss rekord.

Mihimo sab og kasikas sila si Ron Dennison ug Limuel Tampus, nga nagkumbinar og 27 puntos, pito ka rebounds, ug unom ka assists.

Ang Cebu alkansi og tres puntos, 21-24, human sa unang kuwarter apan milusad og mainit nga resbak aron ilogon ang labaw, 47-43, sa halftime.

Padayong nanginit ang Cebu sa ikatulong kuwarter diin kini mipaulbo og 34 puntos aron pag-abante og 23 puntos, 81-58,padung sa pinal nga 10 minutos.

Wala mikompiyansa ang Greats bisan sa dako nilang bentaha aron pagpreserba sa 22 puntos nilang demolisyon.

Si Jacob Galicia mihipos og 17 puntos ug unom ka rebounds, sila si Keith Pido ug Michael Lambino mitali og 14 puntos matag usa samtang si Warlo James Batac miposte og 12 puntos ug lima ka assists apan sa way kapuslanan kay ang Pasig natagak sa 9-8.