Suspek sa pagpamusil nadakpan
CEBU, Philippines — Usa ka lalaki nga giingong suspek sa pagpamusil sa Barangay Mabolo, Cebu City niadtong Domingo sa hapon, Mayo 31, 2026, nadakpan sa kapolisan pipila ka oras human sa insidente. Nasikop ang suspek atol sa gilusad nga hot pursuit operation sa Mabolo Police Station ug nasakmit gikan kaniya ang usa ka caliber .45 pistol ug mga buhing bala nga gituohang gigamit sa pagpamusil.
Ang biktima nga naangol sa pagpamusil gidala dayon sa usa ka tambalanan aron matambalan ug masusi sa mga doktor.
Wala pa gibutyag sa kapolisan ang mga ngalan sa biktima ug sa nadakpang suspek samtang padayon ang ilang imbestigasyon sa maong insidente.
Sa ilang imbestigasyon, nakakuha og impormasyon ang mga pulis nga nakatabang sa pag-ila sa giingong suspek nga niresulta pagkasikop niini
Sa laing bahin, usa ka 56-anyos nga lalaki ang nadakpan tungod sa paghupot og dili lisensyadong armas nga .38 caliber revolver, mga bala atol sa implementasyon sa search warrant sa Barangay Poblacion, Badian, Cebu niadtong Mayo 30, 2026.
Gipahigayon ang operasyon sa mga sakop sa Badian Municipal Drug Enforcement Unit ubos sa Badian Municipal Police Station pinaagi sa search warrant nga giisyu tungod sa giingong paglapas sa Republic Act 10591 o ang Comprehensive Firearms and Ammunition Regulation Act.
Nasakmit gikan sa iyang posesyon ang usa ka caliber .38 revolver nga walay serial number, 11 ka bala, usa ka itom nga sling bag nga gisudlan sa pusil ug usa ka holster.
Matud sa Cebu Police Provincial Office ang pagsakmit sa mga loose firearms nakatabang sa pagpugong sa mahitabong krimen.— Cheny Labrador (BANAT NEWS)
- Latest
