Social Climber

Dear Tito Miguel,

Ako diay si Bernard, taga Barangay Sapangdaku , Cebu City. Aduna koy uyab nga ginganlan og Regina, guwapa kaayo.

Apan usa ka butang ang pirmi namong lalisan mao ang grabe niya ka-showy sa social media. Halos tanan niyang paliton, kan-an, ug adtoan iyang i-post dayon. Kung makapalit siya’y branded nga sapatos, relo, o cellphone, kinahanglan ma-post dayon sa Facebook ug Instagram. Puros mi naay trabaho, ug sakto-sakto ra gyud ang among kinitaan. Ang kataw-anan, dunay mga higayon nga inutang niya ang mga butang nga iyang ipang-flex sa social media. Ako na usahay ang maulaw kay mura’g gusto niya nga ipakita sa tanan nga social kaayo siya bisan lisod na diay iyang kahimtang.

Giistoryahan na nako siya bahin ani. Ingon ko nga dili kinahanglan magpasikat pirmi online ug mas importante nga magtigom para sa among kaugmaon. Apan masuko siya ug moingon nga wala lang daw ko kasabot sa iyang kalipay ug diskarte sa kinabuhi.

Karon, naglibog ko kung arte lang ba ni nako o tinuod nga dili maayo ang iyang ginabuhat. Sakto ba nga akong padayonon ang relasyon bisan murag social media ug pagpasikat ang iyang prayoridad? O kinahanglan ba nako siyang pasabton pag-usab bisan pirmi na lang mi mag-away tungod ani? — Bernard

* * *

Bernard,

Social climber siya. Imo na man gi -pm istoryahan, ayaw na balika balika. Pero kay nangutana man ka kun angayan pa ba siya pasabton pag-usab, puede pa. Apan dapat lahi na imong mga punto. Kani ang isulti. Sa iyang pag-flex, samot mahalata nga dili siya datu. Kay ang tinuod nga adunahan, ordinaryo ra kanila ang iyang gipamalit. Kun paliton man gani, mauwaw sila mo-flex ana, kay sa sama nila datu, ila ra nang giuran. Ipaamgo kaniya nga ang tinuod nga adunahan, hilom ra, simple ra ang suoton, walay tatak o brand nga maklaro. Kun duna man, halos dili makit-an apan mahalon tanan. Ipaihap kaniya iyang social media friends ug kun pila ra ang mo-like o mo-react sa iyang gipang-flex. Lagmit dili moabot sa 10%. Buot pasabot hasta iya’ng mga higala sa social media gisum-olan na, o giluod na ba kaha. Sa laktod, nag-inusara siya sa kalibotan nga iyang gimugna, diin kunohay siya adunahan. Kun dili maminaw, pasagdi lang, dili pa man mo minyo, iya ra man kaha kuwarta iyang gigamit. Kun inutang, angay niya bayran. Kun dili, pasagdi gihapon, iya man nang obligasyon. Pero kun kanimo manghuwam aron mamalit siya’g butang o ibayad sa iyang utang, balibad. Kun motabang ka, tabla ra nga gikunsinti nimo iyang pagpaka aron ingnon. Kun wala’y kausaban, angay na ka magduha duha. Kun magminyo mo, basin unahon pa niya iyang mga pasikat kaysa panginahanglan sa inyong balay. Inay nga sa kinabuhi siya imong kapikas, basin kanimo siya pa ang mopikas pikas. — Tito Miguel

Magpatambag ka? Ipada kang Tito Miguel: 0991-318-9366