Sara nagsalimuang na

Kon wala pa kang kabantay, wala na magkadimao ang sinultihan ni Bise Presidente Sara Duterte. Gibalikbalik nga wala na siyay salig sa mga korte pero:

• Nihulga nga ikiha si kanhi Police Corporal Rodolfo Gracioso Jr. kon makakuha og kopya sa affidavit nga nipasangil nga nakadawat og kapin sa P2 bilyones nga kickback ni kanhi House Speaker Lord Alan Velasco; ugNihangop sa mga petisyon sa iyang mga dumadapig nga niawhag sa Korte Suprema paghunong sa impeachment trial tungod sa pagpaubos sa senator judges sa mga boto nga gikinahanglan pagkonbikto niya.              

* * *

Wala gyod tingali siyay bilib sa mga korte. Kay nibalik man si VP Sara og palaban sa Korte Suprema karong tuiga human nakadaog ang iyang nahaunang petisyon sa niaging tuig sa pagdeklarar nga unconstitutional sa articles of impeachment batok niya.

Natakdan sab ka walay bilib sa mga korte ang iyang bana nga si Atty.Mans Carpio. Kay nagbalikbalik sab og pasaka og mga kaso sa Quezon City Regional Trial Court. Bisan kon gisalikway ang tanan niyang mga pagsuway paghunong sa impeachment proceedings sa House Justice Committee sayo karong tuiga.

* * *

Walay salig sa mga korte si VP Sara pero wala managana paggamit sa korte pagbabag sa legal nga mga proseso pag-imbestigar ug pagpatubag niya. Ug sa kaso ni Gracioso sa paghulga nga mabasura sab ang iyang affidavit sama sa nahitabo sa dili lang usa kon dili duha ka affidavits ni Ramil Madriaga.

Pasayloa si VP Sara. Tungod tingali sa kalibog nalipat siya. Iyang kasong perjury batok ni Madriaga maoy gibasura sa piskaliya sa Taguig.

* * *

Dugang timaan sa kalibog ni VP Sara: Gihulagway ang affidavit ni Gracioso nga pagbuhi sa himatyon nang impeachment case. Human sa tulo ka buwan nga husay, ang depensa ni VP Sara maoy naglisod pagsagang sa mga pasangil sa prosekusyon. Kansang mayoriya sa mga ebidensiya gikan niya.

Ambot nakabantay bang siyay labing apiki. Napakyas pagkumbinser sa militar paglusad og kudeta. Napakyas pagtapok og igong gidaghanon para sa people power. Human napakyas pag-ila nga mga bayani ang maleta boys, siya na say gitulisok nga naka-maleta. Ug walay timaan nga luwason sa mga huwes nga utangan og kabubut-on kay mga tinudlo sa iyang amahan.