15 kahon ng dokumento sa ‘confi funds’ iprinisinta
MANILA, Philippines — Iprinisinta kahapon ng House prosecution team sa Senate impeachment court ang 15 kahon ng mga dokumento kaugnay ng umano’y confidential funds records para sa paglilitis ni Vice President Sara Duterte.
Bago ang direktang pagsusuri sa prosecution witness mula sa Commission on Audit (COA), inihayag ni private prosecutor Lorna Kapunan ang volume ng mga ebidensyang ipriprisinta.
Ang rekord ay naglalaman ng liquidation documents na isinumite ng Office of the Vice President (OVP) at ng Department of Education (DepEd) sa COA bilang suporta sa pag-liquidate sa confidential funds.
Kabilang sa nilalaman ng dokumento ay ang P 500 milyon sa OVP confidential funds para sa ikaapat na bahagi ng 2022 at sa unang ikatlong quarters noong 2023 at P112.5 milyon sa confidential funds ng DepEd para sa unang bahagi ng ikatlong quarters ng 2023.
Ayon kay Kapunan si dating COA Intelligence and Confidential Funds Audit Office (ICFAO) state auditor Roderick Wamil ay kayang tukuyun ang 50 exhibits habang ang acknowledgement receipts para sa ikaapat na quarter sa Office of the Vice President ay nasa 845 na dokumento.
Nasa 3,664 namang dokumento o 3,617 acknowledgement receipts ang ipinatukoy sa ikalawang testigo mula sa COA officers.
Inihirit din ni Kapunan sa impeachment court na tanggapin ang mga patakaran ng ebidensya na karaniwan sa prosekusyon at sa defense team na magsagawa ng pagbulatlat sa presentasyon ng mga ebidensya.
- Latest
