Cebu Greats mikaon sa Bigz Burger
CEBU, Philippines — Si Limuel Tampus mipabuto og 20 puntos uban ang walo ka rebounds, tulo ka assists, usa ka steal, ug usa ka block sa dihang gikaon sa Cebu Greats ang Marikina Bigz Burger, 87-74, sa Maharlika Pilipinas Basketball League (MPBL) Season 8 niadtong Huybes, Hulyo 30, didto sa FilOil Ecooil Centre sa siyudad sa San Juan City.
Ang Greats alkansi 16-18 human sa unang kuwarter apan mibawos pinaagi sa nagkayong 20-9 rally aron kontrolahon ang duwa uban ang 36-27 nga bentaha sa halftime.
Ang Cebu miinat sa ilang labaw ngadto sa 15 puntos, 64-49, ug sa dihang ang Marikina nakasikit, 62-70, si Tampus mikadlit og nuybe puntos sa wala pa si Al Francis Tamsi milansang og hagpok kaayong 3-pointer sa pinal nga 3:15 aron tabangan ang Greats pagpreserba sa 13 puntos nilang kadaogan. Si Tamsi miposa og lima ka tres sa iyang 19 puntos samtang sila si Mark Meneses ug Alvin Baetiong parehong mirehistro og double-double.
Si Meneses mipupo og 12 puntos ug 16 ka rebounds samtang si Baetiong miposte og 10 puntos ug 11 ka rebounds alang sa Cebu, nga nagkupot na karon og 16-5 rekord.
Si Deo Timajo mitapos uban ang 20 puntos, siyam ka rebounds, ug unom ka assists samtang sila si John Ray Alabanza ug Jeepy Faundo nagkumbinar og 27 puntos apan sa way kapuslanan kay ang Bigz Burger natagak sa 7-14.
- Latest
