Power plant outages sa Mindanao posibleng makaapekto sa Visayas grid

CEBU, Philippines — Ang Department of Energy (DOE) nipadayag nga hugot nilang gibantayan ang mga power plant outages sa Mindanao nga posibleng makaapekto sa Visayas grid ilabina sa kasamtangang yellow alert status nga nasinatian sa rehiyon.

Si Mario Marasigan, DOE supervising undersecretary alang sa Electric Power Industry Management Bureau (DOE-EPIMB) nagkanayon kagahapon nga mga 450 megawatts sa kuryente kasagarang gi-export gikan sa Mindanao padulong sa Cebu isip kabahin sa interconnection support tali sa duha ka grids.

Apan iyang giklaro nga ang actual nga gibalhin nga kapasidad dili kanunay moabot sa tibuok 450-megawatt nga lebel.

Matud sa DOE nga sa karon ang Mindanao ug Visayas nagpadayon sa normal nga market conditions nga adunay igo pa nga available capacity nga gihatud tali sa duha ka grids bisan pa sa nagpadayon nga mga outage sa Mindanao.

Si Marasigan nagkanayon nga tungod kay ang Mindanao wala pa nakaabot sa peak demand tungod sa daghang apektadong power plants aduna pa’y igo nga kapasidad nga makasuporta sa inter-regional transfers sa karon.

Ang tibuok epekto sa Visayas grid magdepende kong unsa kadali ma-restore ang mga apektadong planta sa Mindanao ug kong ang mga nahibiling outages makapakunhod ba sa available export capacity sa umaabot nga mga adlaw.

Ang monitoring ginahimo kada adlaw matag oras ilabina sa koordinasyon sa National Grid Corporation of the Philippines (NGCP) aron mahibaloan kong kinahanglan ba og adjustments sa power flows niadtong Lunes ug kagahapon sa buntag.

Giklaro as DOE nga bisan adunay posibleng epekto sa suplay sa Visayas lig-on pa ang sestema sa karon ug adunay igo pa nga reserves aron matubag ang demand.

Si Marasigan nagkanayon nga ang sitwasyon hugot nga gibantayan tungod sa interconnection ug power transfers tali sa duha ka grids ilabina pinaagi sa electricity exports gikan sa Mindanao padulong sa Cebu. Dugang ni Marasigan nga base sa projections sa NGCP ug system outlook assessments, ang demand sa Mindanao mas ubos tungod sa nagpadayon nga outages nga nagtugot sa pipila ka kapasidad nga ma-share sa Visayas. BDB BANAT NEWS