Namirma sa impeachment vs VP Duterte gisaway 

CEBU, Philippines — Nakadawat og ubay-ubay nga pagsaway ang mga kongresista sa Sugbo  nga mipirma sa ikaupat nga impeachment complaint batok kang Bise Presidente Sara Duterte.

Sa 11 ka kongresista sa Sugbo apil na niini ang mga kongresista sa Probinsya ug sa mga lone disricts sa Mandaue, Lapu-Lapu ug Cebu City.

Ang mga mipirma aron ma impeach si Duterte mao sila si Cebu City 2nd District Congressman Eduardo Rama; Lapu-Lapu City, Lone District Congresswomen Cindi Chan; Lolypop Ouano-Dizon sa Mandaue City, Lone District; Rhea Mae Gullas sa primero distrito sa probinsya sa Sugbo; Edsel Galeos sa segundo distrito; Janice Salimbangon sa cuatro distrito; Duke Frasco sa kinto distrito; Daphne Lagon sa sixto distrito; ug Peter John Calderon sa ikapitong distrito sa probinsya sa Sugbo.

Napuno sila karon og pagsaway ug pamuyboy gikan sa mga netizens diha sa social media mao nga ang uban sa ilang mga accounts ilaha nang gi-off ang comment section sa ilang Facebook page.

Ang mga netizens wala kauyon sa gihimo sa mga kongresista ug mibahad nga karong umaabot nga piniliay dili na nila sila suportahan.

Adunay uban mihulagway nga "balingbing" ug "walay baruganan" ang mga kongresista hilabina ang mga mipirma naila nga kaalyado sa mga Duterte kaniadto.

Pipila pud sa hulagway sa maong mga kongresista uban ni bise president Duterte kaniadto sa panahon nga alyado pa sila ang nitumaw sa social media.

Sa pagsulat niining balita, wala pay gipagawas nga pamahayag ang maong mga kongresista sa ilang desisyon pagpirma sa impeachment complaint batok kang Duterte.

Samtang, nagdumili pagkomento si Kongresista Pablo John “PJ” Garcia  nganong wala siya mipirma. Moabot 215 ka magbabalaod ang mipirma sa impeachment complaint.

Si Garcia nagkanayon nga isip respeto sa iyang mga kauban sa balay balauranan maong di siya mokomento. “Out of respect for colleagues who have different views, I will not be making a comment. Thank you,” sumala ni Garcia kinsa igsoon ni Gobernador Gwendolyn Garcia.

Sa 11 ka mga kongresista sa Sugbo, si Garcia ug si Cebu City First District Representative Rachel Marguerite Del Mar ang wala mopirma .

Sa pikas bahin, si kanhi mayor Michael Rama sa Dakbayan sa Sugbo nagdumili pagkomento nganong mipirma iyang pag-umangkong si Kongresista Edu Rama sa South District.

Ang kanhi mayor maoy giilang lider sa PDP-Laban dinhi sa Visayas nga maoy partido sa mga Duterte. Samtang ang iyang pag-umangkon ubos sa Partido lakas.  Gikan sa Ubos Balay Balauran ang impeachment complaint  iduso ngadto sa Senado. Apan ang Senado kagahapon mi adjourn sa ilang sesyon ug mobalik na inig ka Hunyo 2 karong tuiga human ang eleksyon.

Walay mahisguti atol sa sesyon sa Senado kagahapon ang impeachment complaint batok sa bise presidente.

Si Senate President Chiz Escudero nagkanayon nga walay impeachment trial nga mahitabo batok kang Duterte samtang “on break” ang Senado.

“Kung may mangyayari mang aksyon o kaganapan kaugnay nito, ‘yan ay mangyayari sa June 2, pag-resume ng Senado matapos ang eleksyon at pasya ‘yan ng mayorya sa Senado,” matud ni Escudero. (BANAT NEWS)