Warriors padayong nanginit, gipabugnaw ang Heat

CEBU, Philippines — Si Stephen Curry mipabuto og 29 puntos aron pangulohan ang Golden State Warriors ngadto sa 120-100 nga pagpakaging sa Miami Heat sa 2026-27 NBA season kagahapong adlawa didto sa Chase Center sa San Francisco, California.

Nanghugyaw sab ang eksplosibong rookie nga si Yaxel Lendeborg uban ang 17 puntos, walo ka rebounds ug unom ka assists aron tabangan pagbitad ang Warriors ngadto sa ikaunom nilang sagunson nga daog.

Dako sab og naambag si Draymond Green bitbit ang 13 ka assists ingon man si Georges Niang uban ang 13 puntos alang sa Warriors, nga dalaygon kaayong namawi human napildi sa nag-una nilang tulo ka duwa.

Si Giannis Antetokounmpo miharos og 20 puntos ug 14 ka rebounds, si Davion Mitchell midugang og 22 puntos ug walo ka assists samtang si Bam Adebayo midugang og 18 puntos ug 10 ka rebounds alang sa Heat, nga wala na makarokober human gipabuthan og mainit nga 26-9 rally sa Warriors sa ikatulong kuwarter.

Didto sa Phoenix, si Devin Booker mipaulbo og 30 puntos ug si Dillon Brooks mitampo og 24 puntos sa dihang gipakgang sa Suns ang upat ka sagunson nilang pildi uban ang 117-104 nga pagpayaka sa Orlando Magic.

Luyo sa pagmangtas nilang Booker ug Brooks, ang Suns miposte og 23 puntos nga labaw, 96-73, padung sa katapusang kuwarter.

Si Miles Bridges mikuha sab og atensiyon uban ang 18 puntos ug 13 ka rebounds alang sa Suns.

Si Wendell Carter Jr. mikadlit og 27 puntos, si Tristan da Silva mi-iskor og 18 samtang si Franz Wagner mihipos og 15 puntos ug 15 ka assists apan nakawang ang ilang paningkamot sa Magic.