Nabalaka sa marupok nga higala

Dear Tito Miguel,

Maayong adlaw,  ako diay si  Jess, taga Barangay Kalunasan, Cebu City ug naa koy problema bahin sa akong amiga nga si Sheilamie.

Si Sheilamie kay dugay na nakong amiga . Karon, naa siyay feelings sa akong amigo nga si Japhet.  Ang problema lang, kabalo ko sa batasan ni Japhet ug daghan kaayo og babaye.

Dili siya seryoso sa relasyon ug dali ra kaayo siya makig-close ug makig-flirt sa ubang babaye.

Nakabantay ko nga murag niaksyon napud og diskarte si Japhet kaniya. Akong giingnan si Shelamie nga mag-amping ug ayaw dayon ihatag tanan niyang pagsalig kang Japhet. Gisultihan nako siya nga basin masakitan ra siya sa ulahi. Pero bisan unsaon nako og tambag, dili gyud siya maminaw.

Ingon siya nga basin mausab si Japhet . Nakasabot ko nga gusto niya hatagan og chance si Japhet, pero nahadlok ko nga basin sa ulahi, siya ra gihapon ang mag-antos.

Ang akong pangutana, unsaon nako pagtabang kang Shelamie? Kinahanglan ba nako siya pasagdan nga makakat-on pinaagi sa iyang kaugalingong kasinatian, o ipadayon nako ang akong pagpahimangno kaniya? - Jess -

* * *

Jess,

Human na man ka’g tambag ug pahimangno, pasagdi na siya unsa iya desisyon. Dako na man siya. Gibuhat na man nimo tanan isip higala, di na ka niya mabasol kun mahitabo imong gikahadlokan. Oo, ang pinaka epektibo nga leksyon ka’y kun mahisugamak na siya sa kasinatian. Dili na ka angay makonsensiya kun masakitan siya, wa man ka magkulang, imo man siya gi-warningan.

Basin diay tuod sa iya mag-usab ang imong higala nga himabaye. Kay  duna gyud katapat ang tanan.

Ang uban tingali iya ra ilad-ilaron, pero sa iya kalit siya magtinarong. Basin lang, pero kay kaila man ka sa imong higala, mora’g di gyud ka motuo nga mag-usab siya.

Busa kani ang buhata, hangyoa sab imong higala nga dili paasahon imong amiga. Kun dili siya seryoso ug wala siya’y plano magtinarong, putlon na niya kun unsa ma’y nasugdan nila karon. Pero’g dili maminaw, tambagi silang duha nga magklarohay na lang kun asa ra sila taman.

Lagmit sa pagka karon naibog ra sila sa usa’g usa. Mahimo nila pagbigyan ilang kaugalingon. Wala’y commitment, igo ra sila mosuway ug motilaw kun mahimo ba’ng sila. Kun craving satisfied, tagbaw na ug di na mangita sa usa’g usa. Pero kun ila ipadayon, pasagdi na sila. Nabuhat na nimo tanan isip higala. Unya’g mahitabo imong gikahadlokan, ayaw na nawonga’g basol imong amiga. Ang nasakitan siya mao na’y resulta kay wa ka niya paminawa. -Tito Miguel-

Magpatambag ka? Ipada kang Tito Miguel: 0991-318-9366