NLEX wa gihapoy pildi, 5-0 na

CEBU, Philippines — Sila si DeQuan Jones ug Schonny Winston mikuha og atensiyon sa dihang giinat sa NLEX Road Warriors ang way pildi nilang sinugdanan uban ang 119-107 nga pagpakaging sa misukarap nga Converge FiberXers sa PBA Season 50 Governors' Cup niadtong Sabado sa gabii, Agosto 1, didto sa SM Mall of Asia Arena sa dakbayan sa Pasay.

Si Jones mibubo og 28 puntos, apil ang 12 sa katapusang 14 puntos sa Road Warriors nga naghatud kanila sa labiung nindot nga 5-0 rekord sa liga ning panapos sa season nga komperensiya.

Wala magpabitin si Winston nga mitagak og 17 sa iyang 24 puntos. Mibirada siya og 10 puntos sa katapusang kuwater nga nakapainit sa NLEX human sa 88-88 nga panagtabla.

Dako sab naambag si Robert Bolick uban ang 19 puntos, siyam ka rebounds ug 10 ka assists ingon man si Anthony Semerad nga mipupo og 12 sa iyang 15 puntos sa unang kuwarter, tanan mga 3-pointers.

Si Jamaal Franklin mihipos og 26 puntos, pito ka rebounds ug unom ka assists apan sa way kapuslanan kay ang Converge nakatilaw sa ikatulo nilang sagunson nga pildi human sa maanindot nilang 3-0 nga sinugdanan.

Sa laing duwa, ang kuwang og tawo nga TNT Tropang 5G mipakugang sa all-Filipino champion San Miguel Beer sa overtime, 93-89.

Ang mibalik nilang import nga si Rondae Hollis-Jefferson mikolekta og 20 puntos, 13 ka rebounds ug pito ka assists samtang si Kim Aurin, nga mi-average lamang og 1.7 puntos sa miaging komperensiya, mipabut6o og 23 puntos aron tabangan ang TNT pag-inat sa ilang baraha ngadto sa 3-2.

Si George King mipatuasik og 35 puntos apan wala mosaler ang impresibo niyang salida kay ang Beermen natagak sa 4-2.