Wedding exhibit gilusad sa Probinsiya sa Sugbo

CEBU, Philippines —  Gipadayag ni Cebu Governor Pamela Baricuatro ang nagkadako nga kusog sa probinsya sa turismo ug lokal nga negosyo atol sa iyang pagpangulo sa pag-abli sa “Kasalan sa Segundo og Sixto Distrito: Our Wedding Destinations of Cebu,” usa ka exhibit nga nagpakita sa mga wedding tourism nga gitanyag sa Ikaduha ug Ikanunom nga Distrito, apil ang Lapu-Lapu City.

Sa iyang mensahe, giabiabi ni Baricuatro ang mga stakeholder ug bisita sa iyang gihulagway nga laing makapahinam nga showcase, ug mipasabot nga ang exhibit dili lang para sa kasal kondili usa ka mas lapad nga presentasyon sa mga destinasyon, produkto, serbisyo, ug kultural nga identidad sa Cebu.

Gipunting sa gobernador nga samtang ang kasal simbolo sa gugma ug selebrasyon, ang exhibit nagpakita usab sa creativity, craftsmanship, ug hospitality sa mga Cebuano nga komunidad nga naghubit sa identidad sa turismo sa probinsya. Giawhag ni Baricuatro ang publiko nga bisitahon ang Districts 2 ug 6 ug ang Lapu-Lapu City, nga iyang giila nga dili lang para sa kasal kondili usa ka hub sa leisure, kultura, negosyo, ug makahulugang biyahe.

Gikutlo usab niya ang kalampusan sa miaging “Our Cebu” exhibits, diin ang unang tulo ka edisyon nakamugna og kapin ?1.1 milyon nga halin gikan sa mga partisipating LGU, nga nagpakita sa kusog nga lokal nga partisipasyon ug epekto sa ekonomiya.

Matod niya, ang exhibit kinahanglan mahimong hugpong sa mas lig-on nga partnerships, dugang turista, ug mas daghang oportunidad alang sa komunidad, samtang gipasiugda ang malungtarong pag-uswag sa turismo.

Ang tulo ka adlaw nga kalihukan matapos karong adlawa, Hunyo 21, 2026.

Sa bahin sa turismo, gipadayag ni Cebu Province Tourism Officer Rowena Montecillo ang nagkadako nga potensyal sa wedding tourism sa probinsya, tungod sa lainlaing destinasyon, kusog nga hospitality sector, ug ekonomikanhong benepisyo sa destination weddings.

Matod ni Montecillo, ang Cebu padayon nga nagbarog isip premier wedding destination, gikan sa heritage churches ug cultural towns hangtod sa coastal ug luxury resort settings.

Lakip sa gihimong ehempIo ang lungsod sa Alcoy, Oslob, ug Santander, ug uban pang coastal nga lungsod, isip angay nga lugar para sa nature-inspired ug beach weddings.

Gipunting usab niya ang urban ug modernong setup sa Mandaue City ug Consolacion nga angay para sa dagkong receptions ug contemporary celebrations.

Samtang ang Cordova ug Lapu-Lapu City giila isip island ug waterfront destinations nga adunay world-class resorts ug nindot nga coastal views alang sa destination weddings ug sunset ceremonies. (BANAT NEWS)