Ang Kapitbahay (128)
NAKITA ni Vince na isa-isang pinulot ni Margie ang mga nakakalat na damit sa semento. Patuloy na sumisigaw si Renan habang nakatingin kay Margie. Nagliliyab ang mga mata nito sa galit.
Matapos mapulot ang mga damit ay nagmamadaling lumabas ng gate si Margie. Mistulang hayop na bahag ang buntot na nagkumahog sa pag-alis para hindi matikman ang bangis ng galit ni Renan.
Nang makaalis si Margie, pumasok na sa loob ng bahay si Renan. Kung ano ang ginagawa sa loob ay hindi alam ni Vince.
Maaring nakaupo sa sopa at nagmumuni-muni sa nangyari sa kanyang buhay.
Maaring natuklasan na ni Renan ang pagsama ni Brenda kay Ram. Tiyak din na nalaman na niya na si Ram ang kalaguyo ni Margie. Maaring umamin na si Margie. Iyon ang dahilan kaya sumisigaw sa galit si Renan kanina—ang kalaguyo ni Margie ang sinamahan ni Brenda. Walang kasingsakit. Dahil sa paglalaro ng apoy ni Margie, nadamay sa sunog si Brenda.
Mabuti at nakapagtimpi si Renan at hindi napatay si Margie. Kung sa ibang lalaki nangyari iyon, baka bangkay na si Margie.
(Tatapusin na bukas)
- Latest
