Ang Kapitbahay (104)
ISANG araw makaraang makaalis si Renan patungong Saudi, nagkausap sila ni Margie. Nagwawalis si Vince ng mga laglag na dahon ng mangga sa bakuran.
Tinawag siya ni Margie.
“Umalis na si Renan kahapon. Alas dose ang flight niya patungong Riyadh.”
“Nagpaalam nga siya sa akin a day before. Kumusta naman ang flight niya?”
“Safe naman daw. Tumawag siya sa akin kaninang umaga.”
“Mabuti naman at safe ang biyahe niya.”
“Nahomsik na nga raw siya pagdating sa tirahan nila.”
“Isang taon lang naman at narito na uli siya.”
“Iba raw ang feeling niya ngayon kaysa noon.”
“Na-miss ka agad siguro?”
“Oo raw—pati anak namin.”
“Mahal ka kasi niya.”
Napabuntunghininga si Margie.
Matagal bago nagsalita.
“Salamat at wala kang binanggit sa kanya Vince tungkol sa—”
“Tungkol sa inyo ni Ram?”
Tumango si Margie.
“Nangako ka naman sa akin ‘di ba na puputulin mo na ang pakikipagrelasyon kay Ram?”
“Oo.”
“Tutuparin mo?”
Tumango.
“Mabuti kung ganun. Para rin sa inyong maayos na pagsasama ‘yan. Isa pa, para sa anak n’yo.”
“Oo nga, Vince. Salamat sa payo.”
“Basta nangako ka—tapusin mo na ang pakikipagrelasyon kay Ram.”
“Oo.” (Itutuloy)
- Latest
