Ang Kapitbahay (85)
“HINDI ka natatakot na baka isang araw na magkasama kayo ni Ram ay maaktuhan kayo ng mister mo?” tanong ni Vince.
“Ba’t ako matatakot? Kung siya nga na unang nangaliwa e hindi natakot, ako pa?”
“Paano kung isang araw ay biglang dumating ang mister mo at nahuli kayo mismo sa bahay n’yo—magkatabi kayo sa kama ni Ram at nagpapakaligaya?”
“Imposible yun! Ang layo yata ng Saudi!”
“Hindi mo masasabi ang maaring mangyari, Margie. Mayroon nga akong napanood sa TV na binaril ang asawa at kalaguyo nito sa motel. Caught in the act. Umuwi nang lihim si Mister mula Saudi at sinubaybayan si Misis. Sinundan sa motel at dun nangyari ang malagim na trahedya. Patay ang dalawa. Kusang sumuko sa mga pulis ang mister. Hindi raw nagsisisi sa pagpatay sa asawa at lalaki nito.”
Napaismid si Margie.
“Depende yan sa sitwasyon. Siguro mabait yung lalaki at yung misis niya ang unang gumawa ng ‘milagro’. Sa kaso ko, yung mister ko ang unang nambabae—gumanti lang ako.”
“E paano nga kung mahuli kayo sa akto? Ikakatwiran mo bang gumanti ka lang kaya ka nanlalaki?”
“Ah ewan. Basta gumanti lang ako sa asawang taksil,” sabi ni Margie.
“Kailan ba magbabakasyon ang mister mo?”
“Hindi sinasabi.”
“Baka sosorpresahin ka?”
(Itutuloy)
- Latest
