Ang Kapitbahay (63)
SI Marge ang kumakatok sa gate! Bakit kaya?
Lumabas si Vince at binuksan ang gate.
“O Marge, bakit?”
“Kasi bigla kang umalis kanina. Binigyan ko lang ng pera ang anak ko—papasok kasi siya.”
“Nagluto pa ako ng para sa lunch ko, Marge.”
“Ah kaya pala nawala ka na—akala ko nagtampo ka na,”
“Hindi. Ba’t naman ako magtatampo?”
“Kasi’y nawala ka nga. O e nakapagluto ka na?”
“Oo.”
“Anong lunch mo Vince?”
“Ano lang—corned beef na may patatas.”
“Oy ang sarap niyan ha?”
“Pagkain ng mahirap.”
“Hindi pagkain ng mahirap ‘yan, Vince. Sardinas ang pagkain ng mahirap. Ang sarap yata niyan. May sabaw ba ang pagkagisa mo?”
“Oo. Masarap isabaw sa kanin ang sabaw. Lalo kung mainit ang kanin.”
“Parehas pala ang taste natin, Vince.”
“Gusto mo Marge?”
“Nakakahiya naman—para sa lunch mo ‘yan di ba?”
“Sobra sa akin ‘yun. Bigyan kita para matikman mo ang luto ko.”
“Talaga? Sobra sa iyo ha? Baka napipilitan ka lang?”
“Hindi.”
“Thanks Vince.”
“Halika pasok ka.”
Pumasok si Marge.
Hindi akalain ni Vince na sasama sa kanya si Marge sa loob. Hinayaan na niya.
Napakabastos naman niya kung sasabihin na maghintay sa labas. Kasama niya si Marge hanggang sa kitchen.
“Ang laki ng bahay mo Vince—ang ganda ng kitchen mo.”
Ngumiti lang si Vince.
(Itutuloy)
- Latest
