New Year’s Day: kaarawan ng lahat

NAKAKATAWA tayo. Balak natin simulan ang taon sa pamamagitan ng new year’s resolutions upang maging mabuting tao. Pero bago yon, naglalasing tayo, nagpapakabundat, naninigarilyo, nagpupuyat, at peligrosong nagpapaputok.

Tapos, lumalabas sa surveys, 55 percent lang sa atin ang aabot nang isang buwan sa pagtupad ng New Year’s resolutions; 40 percent lang ang aabot nang anim na buwan; at 19 percent nang dalawang taon.

New Year’s Day lang ang maituturing na tunay na international holiday. Karamihan ng mga bansa ay gumagamit ng Gregorian calendar, kung saan ang New Year’s Day, o unang araw ng taon, ay Enero 1. Pero ipinatupad ang kalendaryong ito ni Pope Gregory noon lang 1582. Bago nu’n Julian calendar ni Julius Caesar ang gamit sa Uropa, at hanggang ngayon sa ilang Eastern Orthodox religions. Unang araw din ng Julian calendar year ang New Year’s Day, na ngayon ay pumapatak na sa Enero 14 ng Gregorian calendar.

Marso 25, panahon ng Pasko ng Pagkabuhay, dinaraos ng mga sinaunang Kristiyano ang New Year’s Day. Dahil Protestante ang monarkiya ng England, ipinagpatuloy nito ang pagdiwang ng New Year’s Day sa Marso 25 hanggang 1753, imbis na bumago sa Gregorian calendar noong 1582.

Birthday ng bawat nilalang ang New Year’s Day, ani Charles Lamb. Kaya mainam na araw ito para simulang magbago. Kung sa Enero 1 makalimutan mo maglista ng New Year resolutions, maaring humabol sa iba’t-ibang New Year’s Day ng iba’t-ibang kultura o relihiyon. Sa lunar calendar ng mga Tsino, ito’y sa unang araw ng Spring; Marso 20 ngayong 2026. Sa Iran ito’y Marso 21; sa Thailand, Abril 1; Alexandrine, Agosto 29, at sa mga Muslim, Hunyo 16 ngayong 2026.

* * *

Makinig sa Sapol, Sabado, 8-10 ng umaga, DWIZ (882-AM).