Bubot na Bayabas (103)
KAILAN mo balak na puntahan si Tandang Santo, Apol para makapaghanda rin ako,’’ tanong ni Manang.
“Sasabihin ko po muna kay Guava, Manang. Kapag pumayag siya, sasabihin ko sa’yo kung kailan tayo pupunta.”
“Sige Apol. Puntahan mo lang ako rito.”
“Sige Manang. Pero baka nakakaabala ako sa’yo—nagtitinda ka.”
“Hindi. Okey lang sa akin Apol. Gusto ko nga uli na makarating sa Nagcarlan. Isang beses pa lang akong nakarating dun. Gusto kong bumili ng espasol at sing-aling.”
“Ah sige po. Ia-advise kita kung kailan tayo pupunta sa Nagcarlan. Sasabihin ko kay Guava ang napag-usapan natin tungkol kay Tandang Santo.”
“Sige.”
“Pero talaga bang mahusay siya, Manang?”
“Oo.”
“Sana malaman na namin ni Guava ang babaing nagpakita sa kanya sa panaginip. Hangga’t hindi namin nalalaman kung sino ang babae, hindi kami komportable.”
“Pati ‘yung dalagita na kamukha ni Guava, isangguni n’yo na rin. Palagay ko, may gusto ring ipabatid ang dalagita.”
“Oo nga Manang, isasasangguni rin namin ang tungkol sa dalagita.”
“Sige, hintayin ko ang advise mo Apol.”
“Opo Manang.”
DINALAW ni Apol si Guava kinabukasan. Sinabi niya ang tungkol kay Tandang Santo. Bukod sa nanggagamot ang matanda, marunong din ito mag-interpret ng panaginip.
“Sige Apol, puntahan natin si Tandang Santo. Gusto ko nang malaman ang tungkol sa babaing lumitaw sa aking panaginip.”
“Pati ang tungkol sa dalagita ay ikukunsulta natin.”
“Sige Apol.”
(Itutuloy)
- Latest
