Bubot na Bayabas (95)
MATAGAL na magkayakap sina Apol at Guava. Mahigpit. Walang bumibitaw. Talagang mahal na mahal nila ang isa’t isa.
“Ikaw pala ang babaing mamahalin ko. Kaya pala nang una kitang makita sa Ayala Avenue ay hindi na ako mapakali—ilang beses akong nagpabalik-balik sa lugar para ka abangan. Kahit hindi kita nakita, umasa pa rin ako na magkikita tayo—at nagkatotoo. Hindi lang basta nagkita kundi naging nobya pa.”
“Talagang para tayo sa isa’t isa Apol. In-love agad ako sa’yo nung mag-inquire ako para tumira rito—hindi mo lang nahalata.”
“Talaga?”
“Oo. Mahusay lang akong magtago.”
“Sana pala nalaman ko para napremyuhan mo ako ng halik, ha-ha-ha!”
“Alam mo, lalo akong na-inlove sa iyo nang alagaan mo ako magkasakit ako. Bihira na ang katulad mo.”
“Sige naniniwala na ako.”
“Talagang nag-iisa ka, Apol.”
“Sige ano pa?”
Kinurot ni Guava sa braso si Apol.
“Ikaw lamang ang lalaki para sa akin Apol—nag-iisa ka.”
“Ikaw naman ang nag-iisang babae sa akin, Guava.”
“Pero ‘di ba sabi mo, mag-aasawa ka lamang kapag marami ka nang ipon? Paano ‘yan?”
“Marami na akong ipon.”
Napatangu-tango na lang si Guava.
(Itutuloy)
- Latest
