Bubot na Bayabas (24)
HINDI maalis sa isipan ni Apol ang dalagita at ang babaing nakita sa Ayala Avenue dahil sa malaking pagkakahawig ng mga ito. Nagkataon lang kaya ‘yun? Marami naman talagang tao ang nagkakamukha pero hindi naman magkaanu-ano. Ilang Presidente na ng Pilipinas ang may kamukha.
Pero ang pagkakamukha ng dalagita at ng babaing nasalubong niya sa Ayala ay malapit na malapit—parang iisa sila. Parang pinagbiyak na bunga!
Matagal din bago niya naalala kung sino ang kamukha ng babaing nasalubong sa Ayala—ang dalagita pala.
Nahihiwagaan si Apol sa mga nangyayari. Una, biglang sumulpot sa kanyang bakuran ang dalagita at tinangkang kumuha ng bayabas. Ikalawa, wala raw nakikitang dalagita na pumasok sa bakuran, ayon sa may-ari ng sari-sari store.
Saan nanggaling ang dalagita? Mahiwaga talaga!
ISANG umaga ng Sabado, nagwalis ng mga tuyong dahon ng bayabas si Apol. Tinipon din niya ang mga nalaglag na hinog na bayabas. Pinagmasdan niya ang punong bayabas.
Napakabilis lumaki. Natatandaan ni Apol na hindi naman niya itinanim ang bayabas dahil kusa na itong naroon nang bilhin ang lote. Hindi na niya inalis ang bayabas maski nang magpagawa ng bahay. Siguro’y ibon ang nagdala ng buto ng bayabas at lumaki.
Abalang-abala si Apol sa pagwawalis nang may tumawag mula sa labas. Boses ng babae.
“Apol! Apol!”
Tiningnan ni Apol.
(Itutuloy)
- Latest
