Hiyasmin (35)
Kinabukasan nang papasok na sa school si Hiyasmin, binigyan ni Dax ng perang allowance. Bantulot si Hiyasmin pero tinanggap din.
“Dinagdagan ko na ‘yan para kung maisip mong mamalengke pagkalabas mo sa school e meron kang ibibili. Bahala ka na kung ano ang bibilhin para iluto. Ikaw na ang magpasya. Pero kung napapagod ka na, huwag mong pipiliting mamalengke. Kung magagawa mo lang.’’
“Opo Sir Dax. Ako na ang bahala. Kaya ko pa pong mamalengke.’’
“Sige. Salamat.’’
“Aalis na po ako, Sir Dax.’’
“Ingat ka.’’
Umalis na si Hiyasmin.
Inihatid ito ng tanaw ni Dax habang naglalakad sa P. Noval. Hindi alam ni Dax kung sumasakay ng dyipni si Hiyasmin patungo sa school o naglalakad na lang.
Kinahapunan na umuwi si Dax, nagluluto na ng hapunan si Hiyasmin. Pritong pork chop at ginisang ampalaya ang niluluto. Nakadama ng gutom si Dax.
“Malapit na pong maluto—fifteen minutes na lang.’’
“Sige, Hiyasmin. Bango ng pork chop.’’
“Tatawagin po kita pag nakahain na.”
“Thanks.’’
Makalipas ang kinse minutos, nakahanda na ang mesa. Tinawag na ni Hiyasmin si Dax.
Kumain na sila.
“Sarap ng pork chop! Bagay sa ampalaya. Ang dami mong alam na luto, Hiyasmin. Parang nagluto ka sa karinderya dati.”
Napangiti lang si Hiyasmin at nagpatuloy sa pagkain.
Nang biglang may naisip itanong si Dax kay Hiyasmin.
“May itatanong lang ako. Noon ko pa kasi ito napapansin na nahahawig ka sa mga babaing taga-Middle East. Ang beauty mo ay parang Arabyana.’’
“Anak po ako ng Kuwaiti.’’
Napamaang si Dax.
(Itutuloy)
- Latest
