Black Widow (62)
KINABUKASAN, maagang sumundo si Marie sa anak na si Pau. Pero talagang inagahan niya ang pagtungo roon para makapagkuwentuhan sila nang matagal ni Jose. Bitin ang pagkukuwentuhan nila kahapon. Marami siyang gustong malaman kay Jose. Kung bakit ay hindi niya alam. Basta gusto niyang may mahukay pa sa buhay ni Jose. Napangiti si Marie.
Nagulat si Marie nang dumating sa school sapagkat naroon na si Jose. Nakaupo na ito sa dati nilang inupuan kahapon.
Nakita na siya ni Jose. Nakangiti ito habang nakatingin sa kanya.
“Ang aga mo Jose,” sabi ni Marie at naupo sa tabi nito.
“Para marami tayong mapagkuwentuhan, Marie.’’
“Oo nga. Marami pa akong hindi naitatanong sa’yo.’’
“Ako rin. Kaunti pa lang ang nalalaman ko ukol sa’yo.’’
“Para pala tayong mga NBI na mag-iimbestiga sa bawat isa.’’
Nagtawanan sila.
“Saan ka nga pala nagtatrabaho Marie?’’
“Sa isang kompanya na gumagawa ng beauty products. Sa opisina ako.’’
“Kaya pala maganda ka.’’
“Thanks. Ikaw saan ka naman nag-work?”
“Sa kompanya ng gatas. Yung pang infant milk. Sa office din ako.’’
“Kaya pala mukha kang bata--- batang isip, he-he-he! Joke!’’
Nagtawanan sila.
“Sinong kasama n’yo ni Iya sa bahay? Kayong dalawa lang?’’ Tanong ni Marie. Saka naisip niya bakit ba iyon ang naitanong niya.
“Kaming dalawa lang ni Iya,” sagot ni Jose. “Malungkot nga kung dadalawa…’’
(Itutuloy)
- Latest
