BUONG maghapon na nagkulong sa kanyang kuwarto si Fred. Si Mulong ang gumawa nang lahat sa aroskalduhan. Abalang-abala siya. Kabisado na ni Mulong ang timpla. Dagsa ang kustomer nila.
Nang bumisita si Imelda na kapatid ni Fred ay nagtaka kung bakit nag-iisa si Mulong.
“Nasaan si Kuya Fred mo, Mulong?”
“Nasa kuwarto Ate. Masama ang pakiramdam.”
“Kailan pa?”
“Kahapon pa Ate.”
“Baka may dengue.”
Napatawa si Mulong.
“Ba’t ka nagtawa, Mulong?”
“Hindi siya na-dengue Ate.”
“E ano?”
“Problemado dahil dun sa sunog na nangyari sa Quiapo.”
“Bakit?”
“Kasi yung hinahanap niyang babae na ang pangalan ay Ganda ay kasama yatang nasunog.”
“Diyos ko! Yung babaing taga-liblib, yung maganda?”
“Oo Ate.”
“May narinig nga akong balita sa TV kanina. ’Yung sampu raw ang patay, yun ba ’yon.”
“Oo Ate. Sa restaurant daw nagsimula. Sumabog ang LPG.”
Napa-Diyos ko uli si Imelda.
“Kaya ikaw Mulong, yang LPG mo baka sumisingaw ha. E hindi ba makausap si Kuya mo. May sasabihin sana ako tungkol kay Kim.”
“Katukin mo kaya, Ate. Sabi magpapahinga lang daw siya.”
“Huwag na. Sabihin mo lang kapag lumabas na merong pinabibili si Kim. Gagamitin sa school. Laptop yata.”
“Sige Ate.”
“Ang dami mong kustomer Mulong ah. Siguro ang laki na ng pera ninyo ni Kuya mo.”
“Oo nga Ate. Minsan nauubos ang luto.”
“Suwerte n’yo talaga.”
“Sabi ni Kuya mas lalakas daw ang aroskaldo at batsoy namin kung may masarap kaming puto. Yun kasing tinda naming puto, arina lang.”
“Oo napansin ko nga. Kailangan makakuha kayo nang masarap na magsusuplay ng puto. Lalong dudumugin ang aroskaldo n’yo.”
“Naghahanap nga si Kuya, Ate.”
Nagpaalam na si Imelda.
Makalipas ang isang oras ay lumabas na si Fred. Sinabi ang bilin ni Imelda.
“Siyanga pala Mulong, bukas ay maaga tayong pupunta sa Paco Market.”
“Kaya mo na Kuya?”
“Oo. Kasi’y malakas ang kutob ko, naroon si Ganda. Agahan natin bukas ha?”
Tumango lang si Mulong. Ano itong nangyayari kay Kuya Fred niya? Nahihibang?
(Itutuloy)