Ako ang makasalanan (41)
LUMALIM pa nang lumalim ang imahinasyon ko. Iyon na nga ang rurok ng sinasabi ni Cherry na “tatluhan”. At kung hayop si Bobby, mas hayop din si Cherry sapagkat nakihati sa ginagawang kahayupan ni Bobby. Sinaluhan pa ako ng gaga. Talagang ayaw palalamang, ha-ha-ha!
Hindi pa mapigilan ang paglawak ng aking imahinasyon. Talagang tuluy-tuloy ang agos. Ganoon pala iyon, si Cherry ang nagturo. Hindi ko akalain na kayang gawin ni Cherry pero iyon nga ang ginawa. At kayang-kaya niya. Hindi nahirapan. Ano kayang meron ang Cherry na ito at alam na lahat ang tungkol sa kamunduhan. Sabagay malaki na ang karanasan niya. Una siyang nabuntis ng pinsan. Nagpa-abort. At mula noon ay nagpalipat-lipat na ng lalaki. Hindi rin natupad ang pangako sa kanyang magulang na hindi na maliligaw ng landas. At ngayon, ako ay isinasama na sa pagkaligaw — na gusto ko naman, ha-ha-ha!
Hanggang sa unti-unti ay magbalik ako sa katinuan. Unti-unti nang nawalan ng bisa ang hinithit. Nawala na ang lalim ng imahinasyon nang pagsasalo naming tatlo. Nasusuklam ako. Nandidiri ako.
Nang pagmasdan ko si Cherry ay nakasalampak na ito sa sahig. Namumula ang mga mata. Halatang sabog na sabog.
“Ba’t nakatingin ka sa akin ng ganyan?” tanong.
“Wala.”
“Sabog ka na rin ano?”
“Hindi na gaano.”
“Aayaw-aayaw ka lang e. Di ba ang sarap?”
Hindi na ako sumagot. Baka kung saan lamang mapunta ang usapan.
“Siguro gusto mo rin ng sinabi ko kanina — yung tatlo tayo nina Bobby.”
“Sabog ka pa talaga, ano?”
Humalakhak nang humalakhak ang gaga. Ayaw tumigil.
Hanggang sa makarinig kami ng mahihinang katok sa pinto. Agad na inalis ni Cherry ang mga basahang nakapasak sa siwang ng pinto.
Naisip ko baka si Bobby. Baka gusto na namang magtalik kami. Hindi kaya magkatotoo ang naiisip ni Cherry? Baka bumigay na ako. Nakalublob na ang paa ko sa putik.
(Itutuloy)
- Latest
- Trending
