TIYAK ko, hindi alam ni Ate na ako ang "taong" pumasok sa kanilang opisina kanina at nakasaksi sa "lihim". Aakalain marahil na diyanitor o guwardiya. Wala akong magagawa sapagkat kailangan ko ng pera. Kailangan ko si Ate.
Mabilis akong pumara ng dyip patungong Pasong Tamo St. Mula sa Pasong Tamo ay lalakarin ko na lamang ang condo.
Nagtaka ang yaya ng aking pamangkin sa bigla kong pagsulpot sa condo. Hindi inaasahan na pupunta ako. Iyon ang ikalawang pagpunta ko sa condong iyon. Nasa 15th floor. Fully furnished.
"Wala pa si Ate Mina, Ate Gina," ate rin ang tawag sa akin ng yaya na ang pangalan ay Edith. Nung una ay ayaw pa niya akong tawaging ate dahil ma-rahil isa akong tomboy pero nasanay din.
"Dito na ako matutulog, Edith," sabi ko. "Anong oras pa darating si Ate?"
"Mamaya pa yon Ate, kapag ganitong Biyernes ay nag-oovertime siya. Mga 10 daw siya darating." Tumango na lamang ako. Nag-oobertaym nga si Ate pero obertaym sa pakikipag-sex.
"Kumain ka na Ate?" tanong ni Edith.
"Hindi pa."
Ipinaghain ako.
Sa sopa na lamang ako natulog. Dakong alas-onse ay naramdaman ko ang pagdating ni Ate. Hindi nagtaka nang makita ako. Alam na niya na kapag naroon ako, pera ang dahilan.
Kinabukasan, ay hindi ko na kailangan pang magsabi. Kusa na akong binigyan ni Ate. Matapos akong bigyan ay nagtanong, "May balita ka ba sa probinsiya"
"Tungkol sa asawa mo at kay Inay?"
"Oo."
"Wala."
"Akala ko meron."
Hindi ako makatingin ng tuwid kay Ate. Parang nahuhulaan niya na ako ang "taong" nakakita sa kanila habang nagsi-sex sa loob ng opisina. (Itutuloy)