Celtics, Mavs 2-1 na
CEBU, Philippines — Ubos sa pagpangu sa eksplosibong kombinasyon sa ilang mga bitoon, ang Boston Celtics ug ang Dallas Mavericks mibugha na sab sa ilang mga karibal aron pagposte og 2-1 nga bentaha sa nagkainit nga NBA conference semifinals.
Sa East, sila si Jayson Tatum ug Jaylen Brown nagkumboya'g 61 puntos sa dihang gipayaka na sab sa Celtics ang Cleveland Cavaliers, 106-93.
Si Tatum mikadlit og 33 puntos samtang si Brown midugang og 28 puntos alang sa Celtics nga nakasagunson og duha ka daog human gipakuratan sa Cavs didto sa ilang korte sa Game 1.
Ang Celtics wala na molingi pa sukad mi-abante og dos puntos human sa unang kuwarter.
"We just wanted to bounce back," dason pa ni Tatum, kansang Celtics miinat sa ilang labaw ngadto sa 23 puntos human gipabuthan ang Cavs og 14-0 nga bomba pagsugod sa ikatulong kuwarter.
Si Donovan Mitchell mihipos og 33 puntos alang sa Cavs apan nayayay ang problemado nang daan niyang walang tuhod sa katapusang kuwarter.
Didto sa Dallas, si Kyrie Irving mibubo og 14 sa iyang 22 puntos sa second half samtang si Luka Doncic mipupo og 22 puntos ug 15 ka rebounds sa dihang gipakaging sa Mavs ang West top seed nga Oklahoma City Thunder, 105-101, sa ikaduhang higayon sa ilang serye.
Si P.J. Washington mipabuhagay og 27 puntos samtang si Dereck Lively miamot og 12 puntos alang sa Mavs, nga nakasugakod sa gipaulbong 31 puntos ni Thunder star Shai Gilgeous-Alexander.
- Latest
