MagBeerPagRain hari ng Japa Cup

MANILA, Philippines —  Pinagharian ng MagBeerPagRain ang 2024 PBA Press Corps Raffy Japa Cup basketball tournament matapos gibain ang Ginebra Boys, 80-68, noong Biyernes sa Smart Araneta Coliseum.

Ang MagBeerPagRain ay isang selection ng mga coaches, medical at iba pang support staff ng San Miguel Beer, Magnolia at Rain or Shine sa PBA.

Humakot si tournament Most Valuable Player Aldo Panlilio, ang strength and conditioning coach ng Beermen, ng 19 points, 19 rebounds, 2 assists at 2 steals para pamunuan ang MagBeerPagRain.

Umiskor naman si John Tabasin ng 12 sa kanyang 17 markers sa first period na nagbigay sa kanila ng 23-4 bentahe.

Kumolekta si big man Ethan Casares, ang physical therapist ng Elasto Painters, ng 20 markers, 13 boards, 2 steals at 2 shot blocks para sa MagBeerPagRain na nagtala ng 25-point lead sa fourth quarter ng torneong inihandog ng Burlington, The Socks Authority, at suportado rin ng Rain or Shine, LGR, Gatorade, Philippine Sports Commission at ng PBA.

Tumipa sina Richard Marcos, Aaron Ang at JayR Baron ng tig-siyam na puntos sa panig ng Ginebra Boys ng coach Rey Baron.

Samantala, kumamada si Sydney Talabis ng 26 points, 16 rebounds, 3 assists at 3 steals sa 77-63 pagdaig ng TerraPort sa MVP Sports Foundation para angkinin ang third place.