Lalake midunggab sa iyang ig-agaw gumikan sa utang

CEBU, Philippines — Balhog sa prisuhan ang usa ka 20-anyos nga lalake human iyang gidunggab ang 22-anyos niya nga ig-agaw diha sa Villa Bulsita, Barangay Bulacao, dakbayan sa Sugbo niadtong Lunes sa gabii, Marso 10, 2025.

Ang biktima mao si Ryan Recto, ex-convict ug nagpuyo sa naasoy nga dapit samtang ang suspect mao si Christopher Cabilis, residente ra sab sa lugar.

Nitahan ang suspetsado sa BPSO sa Barangay Bulacao human mahimo ang krimen ug gitugyan dayon kini sa Inayawan Police Station 7.

Ang suspect nga nahinabi sa DYSS Super Radyo Cebu miangkon sa krimen ug mipasabot nga igo ra siya nidepensa sa iyang kaugalingon.

Sigon niya nasuko ang iyang ig-agaw gumikan sa iyang utang nga P35 sa miaging semana.

Nakautang ang suspect og P35 sa biktima tungod kay gipalit niya og pan ug silang duha ang nangaon.

Apan niadtong Lunes, gipaningil siya sa biktima ug mibalid kay wala'y kwarta nga ikabayad.

Nasuko ang biktima nga niresulta sa ilang pagsinumbagay ug gibaharan kini nga patyon hinungdan nga nidagan ang suspect paingon sa ilang panimalay ug nakakuha og sundang.

Pag-abot sa biktima gisugat kini sa suspect og dunggab sa tiyan ug nalangit karon sa tambalanan.

Kay nakonsensiya sa gibuhat maong nitahan kini sa mga tanod ug nangayo og pasaylo sa nahimong krimen. (BANAT NEWS)