Lancers, Baby Webmasters nagpabiling way pilde

CEBU, Philippines — Ang two-time defending champion University of the Visayas (UV) Green Lancers ug ang University of Cebu (UC) Baby Webmasters nakamintinar sa perpekto nilang sinugdanan sa Cebu Schools Athletic Foundation, Inc. (CESAFI) Season 24 basketball tournament niadtong Sabado, Oktubre 5, didto sa Cebu Coliseum.

Sila si reigning CESAFI MVP Kent Ivo Salarda ug Raul Gentallan parehong mikadlit og double-double aron ituboy ang Lancers ngadto sa 77-69 nga pagpakaging sa University of San Carlos (USC) Warriors.

Si Salarda miharos og 21 puntos, 11 ka rebounds, ug duha ka assists, samtang si Gentallan mikolekta og 20 puntos, 12 ka rebounds, unom ka assists ug upat ka steals alang sa ikaduhang sunod-sunod nga daog sa Lancers.

Ang Lancers alkansi og siyete puntos, 30-37, sa halftime apan mibawos pinaagi sa mainit nga 28-17 rally aron ilogon ang labaw, 58-54, human sa tulo ka kuwarter sa hingpit.

Sila si Froiland Maglasang ug Zylle Cabellon nagparamdam sab sa Lancers uban ang 10 puntos matag usa.

Sila si Kyle Maglinte ug James Paolo Gica nagkumbinar og 33 puntos apan pareho silang naminghoy tungod kay ang Warriors misukarap sa ikaupat nilang sagunson nga pilde.

Sa juniors division, ang UC Baby Webmasters miwani sa University of Southern Philippines Foundation (USPF) Baby Panthers, 70-62, sa sangka tali sa way pildeng mga koponan.

Sila si Dio Gonzales ug Carlo Salgarino mikuha og atensiyon sa dihang ang Baby Webmasters miinat sa impresibo ilang ratsada ngadto sa tulo ka duwa ubos sa paggiya sa bag-o nilang head coach nga si Reggie Licanda.

Si Gonzales mihipos og 14 puntos, upat ka rebounds, duha ka steals ug duha ka blocks samtang si Salgarino midugang og 11 puntos, walo ka rebounds ug tulo ka steals alang sa dominanteng Baby Webmasters, nga sa usa ka higayon miabante og 16 puntos, 53-37, sa tunga-tungang bahin sa ikatulong kuwarter.

Si Fritz Gonzales maoy nangu sa USPF uban ang 15 puntos, 12 ka rebounds, duha ka assits ug upat ka steals. Sila si Marcus Lozano ug Champ Brigoli parehong mitali og 10 puntos apan nangahoyhoy ang ilang abaga gumikan kay naputol ang duha ka sunod-sunod nga daog sa Baby Panthers.