Cardinals sumosyo sa 2nd spot
MANILA, Philippines — Sumosyo ang Mapua University sa second place matapos pabagsakin ang Jose Rizal University, 88-81, sa NCAA Season 100 men’s basketball tournament kahapon sa FilOil EcoOil Centre sa San Juan City.
Kumolekta si reigning MVP Clint Escamis ng 19 points, 4 rebounds at 2 assists sa pagdagit ng Cardinals sa ikalawang sunod na panalo para sa 5-2 record katabla ang Letran Knights sa second spot sa ilalim ng St. Benilde Blazers (5-1).
Nagdagdag si Lawrence Mangubat ng 16 markers at may 15 at 13 points sina rookie Chris Hubilla at Cyrus Cuenco, ayon sa pagkakasunod.
Bumulusok ang Heavy Bombers sa 2-5.
Maagang nagposte ang Mapua ng 23-point lead, 42-19, bago tinangay ang 57-41 halftime advantage na muli nilang pinalobo sa 72-57 sa third quarter.
Nagtiyaga ang Jose Rizal at nakalapit sa 73-81 matapos ang three-point shot ni Shawn Argente sa 3:35 minuto ng fourth period.
Ngunit nagsalpak si Mangubat ng triple para muling ilayo ang Cardinals sa 84-73.
Sa ikalawang laro, tinakasan ng Emilio Aguinaldo College ang Lyceum ofthe Philippines University, 90-88, para tapusin ang dalawang dikit kabiguan.
Binuhay ng Generals ang kanilang tsansa sa Final Four sa pagtataas sa 3-4 baraha para tablahan ang Pirates na natikman ang pangalawang sunod na kamalasan matapos maglista ng three-game winning streak.
- Latest
