Baltazar sa Converge; Abarrientos sa Ginebra
![Baltazar sa Converge; Abarrientos sa Ginebra](https://media.philstar.com/photos/2024/07/14/bal_2024-07-14_23-19-14.jpg)
MANILA, Philippines — Hinirang ng Converge si Justine Baltazar bilang No. 1 overall pick ng PBA Season 49 Rookie Draft habang isa na namang Abarrientos ang maglalaro para kay coach Tim Cone.
Wala nang nagulat nang kunin ng FiberXers ang 6-foot-8 na si Baltazar bilang top selection kahapon sa Ayala Malls Glorietta Activity Center sa Makati City.
“Sobrang excited ako na makakampi ko si Justin (Arana) kasi last year kulang sila sa big man at wala siyang nakatulong,” sabi ni Baltazar sa 6’7 na si Arana na kinilalang 2023 PBA Rookie of the Year.
Bukod kay Baltazar kinuha rin ng Converge sa second round sina Paolo Javillonar, Ben Phillips, Jason Credo at Ronan Santos.
Matapos kunin ng Blackwater si Fil-Am Sedrick Barefield bilang No. 3 overall pick ay pinili ng Ginebra si RJ Abarrientos na No. 3 selection.
“Sobrang ito iyong pinapangarap ko, especially na napunta pa ako sa Barangay Ginebra. Hopefully, makatulong ako sa team. Very happy na isa na namang Abarrientos ang makakasama ni coach Tim Cone,” sabi ng pamangkin ni PBA legend Johnny Abarrientos.
Si Johnny Abarrientos ay nakasama ni Cone sa pagkopo sa PBA Grand Slam para sa Alaska noong 1996 bago nagretiro noong 2010 sa kampo ng Ginebra ni coach Jong Uichico.
“It’s a tough decision for us, but you just can’t ignore the bloodline of Abarrientos,” ani Cone kay RJ Abarrientos na kasalukuyang naglalaro para sa Strong Group Athletics-Pilipinas sa Jones Cup sa Taipei.
Ang iba pang nakuha sa first round ay sina No. 4 Kai Ballungay (Phoenix), No. 5 Dave Ildefonso (NorthPort), No. 6 Jonnel Policarpio (NLEX), No. 7 Caelan Tiongson at No. 8 Felix Lemmeti (Rain or Shine), No. 9 Jerom Lastimosa (Magnolia), No. 10 Mark Nonoy (Terrafirma), No. 11 CJ Cansino (Meralco) at No. 12 Avan Nava (San Miguel).
Pinili naman ng Elasto Painters sa second round sina Francis Escando, Mike Malonzo at Migs Cortez habang hinugot ng Gin Kings sina Didat Hanapi at Paolo Hernandez.
Si Evan Nelle ay kinuha ng Batang Pier at sina Paolo Javillonar, Ben Phillips at Jason Credo sa FiberXers.
Napili rin sa second round sina Conrad Catapusan (Terrafirma), Brandon Ramirez (NLEX) at Kurt Reyson (Bolts).
- Latest