CEBU, Philippines - Nakabalik na sa trono ang University of the Visayas (UV) Green Lancers-Haier human nila giharos ang Southwestern University (SWU) Cobras, 64-62 sa deciding game sa ilang
"best-of-five" finals series aron maangkon ang korona sa 13th Cebu Schools Athletic Foundation Inc. (CESAFI) men's basketball
tournament gabii didto sa Cebu Coliseum.
Gawas paglangkat sa ilang ika-10 nga korona, ang UV Lancers mikulit sab og kasaysayan nga maoy unang team nga
nakabangon gikan sa 0-2 nga biya sa finals sukad matukod ang liga niadtong 2000.
Gipangulohan ni John Abad ang kadaugan pinaagi sa iyang 18 puntos, apan ang MVP sa miaging tuig nga si Wowie Escocio
maoy nakaiskor sa winning basket sa katapusang 0.7 segundo.
Si Escocio maoy adunay labing dakung katawa tungod kay kanunay siyang bugal-bugalan sa mga fans sa Cobras matag
higayon nga siya mohimo'g free throw. Midugang si Escocio og 16 puntos, samtang ang import nga si Mike Harry Nzusseu daku sab
natabang sa opensa nga miamot og 11 puntos.
Miiskor dayon og 10-5 ang Lancers sa first period, apan nailog sa Cobras ang labaw sa halftime, 29-28.
Nabaraw ang duwa tungod kay nagguba ang electronic scoreboard ug ang shot clock hinungdan sa kalangay sa duwa halos
duha ka oras.
Gikan sa usa lang unta ka guba, wala madugay naguba gyud ang duha ka shot clock ug tungod kay nagkasabot man ang duha
ka kampo nga tiwason gyud ang duwa, migamit na lang sila og white board nga maoy labing unang hitabo sa kasaysayan sa CESAFI ug
naatol pa gyud sa finals.
Ang maong kadaugan gipahinungod sa Lancers ngadto kang Mrs. Norma Gullas, kinsa magsaulog sa iyang adlaw’ng natawhan
karong adlawa ug ngadto ni UV president Eduardo R. Gullas unya sa Oktubre 13.
Ang athletic director sa UV nga si Congressman Samsam Gullas nagkanayon nga sa napulo ka korona sa Lancers, mao kadto
ang labing tam-is nga kadaugan alang kaniya.
Gisugdan sa Lancers ang third period og 12-0 run aron mapapas ang ilang 28-29 nga biya ngadto na sa 11 puntos nga abante,
40-29 human sa basket ni Abad.
Ang Cobras gipangulohan sa ilang import nga si Landry Sanjo sa iyang 21 puntos. (BANAT NEWS)