Philippine 9(a) visa

MAY isang sumbong na hindi dapat isinasantabi. Dahil kung may katotohanan ang mga paratang na ito, hindi lang ito simpleng iregularidad isa itong direktang sampal sa batas at sa tiwalang ibinigay ng publiko sa mga tanggapan ng gobyerno.

May alegasyon na sa proseso ng pag-apruba ng Philippine 9(a) visa sa isang Philippine Consular Office, may mga indibidwal umanong humihingi o tumatanggap ng humigit-kumulang US$1,000 kapalit diumano ng paglabas ng visa. Kung mapapatunayang totoo, malinaw na hindi na serbisyo publiko ang umiiral kundi negosyo na may presyo ang bawat pirma.

Mas masakit pa rito ang isa pang isyu. May mga 9(a) visa rin umanong naaprubahan sa ilalim ng sponsorship ng kumpanya nang hindi dumaraan sa nararapat na beripikasyon o koordinasyon sa Department of Labor and Employment (DOLE), kung ito ay kinakailangan sa ilalim ng umiiral na mga patakaran. Kung may lumusot na hindi dumaan sa tamang proseso, dapat malaman ng publiko kung sino ang nagpalusot at bakit.

Hindi puwedeng palampasin ang ganitong klaseng sumbong. Ang katahimikan ng mga kinauukulang ahensya ay lalo lamang magpapalakas sa hinalang may mga taong naniniwalang kaya nilang baluktutin ang sistema basta may sapat na pera sa mesa.

Kalakip ng reklamong ito ang mga kopya ng ilang visa approvals at iba pang dokumentong maaaring makatulong sa isang malaya, patas at masusing imbestigasyon. Hindi ito panahon ng pagtatakipan. Panahon ito ng pagsisiyasat.

Kung malinis ang proseso, ilabas ang katotohanan. Kung may nagkasala, papanagutin. Dahil ang gobyerno ay hindi iti­nayo para maging tindahan ng pabor, kundi sandigan ng batas.

Hinihiling din na panatilihing kumpidensyal ang rekla­mong ito at ang lahat ng kalakip na ebidensya alinsunod sa pinapahintulutan ng batas, upang maprotektahan ang nagbigay ng impormasyon habang isinasagawa ang nararapat na imbestigasyon.

Disclaimer: Ang nilalaman ng opinyong ito ay batay sa mga reklamong, alegasyon at dokumentong isinumite para sa beripikasyon ng mga kinauukulang awtoridad. Ang mga paratang ay hindi pa napatutunayan sa hukuman o sa pormal na imbestigasyon. Ang layunin nito ay manawagan ng patas, malaya at masusing pagsisiyasat upang matukoy ang buong katotohanan at mapanagot ang sinumang mapapatunayang lumabag sa batas.