Gipahuong na ang pag-ihap sa mga nangamatay sa super typhoon Yolanda. Kapin na sa 6,000 ang patay dihang gihunong na ang ihap.
* * *
Duna bay nabalaka nga basin moabot ang gidaghanon sa nangamatay sa labing menos 10,000 nga maoy banabana sa usa ka opisyal sa kapolisan ug tungod niini gitaktak siya sa puwesto?
* * *
Dihay usa ka barbero nga misugyot nga mangita na lang ta’g laing iphon ug misugyot sab ang laing barbero nga atoang iphon ang nangamatay ug nangaangol sa mga aksidente sa bus ug ubang sakyanan de pasahero publiko.
* * *
Ning naghinapus na ang tuig 2013 daghang aksidente sa kadalanan diin daghan ang nangamatay ug nangaangol. Didto sa Luzon 18 ang killed dihang niambak sa skyway ang usa ka bus. Didto sa Mindanao napu ang patay sa usa ka highway accident sa Cotabato.
* * *
Dinhi sa ato sa Sugbo diha say aksidente sa bus diin duha ang killed ug kapin sa napu ang angol. Adtong miaging adlaw dunay vehicular collision sa Metro Manila diin duha ang patay.
* * *
Diha pay laing mga aksidente sa kadanan nga atong nalimtan apan napatik sa mga mantalaan. Ang mga kasulwati niini atong iapil sa ihap.
* * *
Nakabantay ba mo nga ang kasagaran sa aksidente sa mga sakyanan de motor ipasangil dayon sa depektosong preno, depektosong steering wheel, upaw na nga mga ligid, etc. Panagsa ra mapasanginlan ang hubog kon nakainom nga drayber kay makamao man mobalibad kun morason. Ang dautang brake kon preno di man makamao mosulti.
* * *
SA LAING BAHIN ... Diha’y usa ka kutsero sa Duljo kinsa proud kaayo nga way bisan usa ka kinabuhi ang nakalas atol sa mga aksidente sa tartanilla ... Daghang salamat sa atong Banat News readers diha sa Argao ug Dalaguete sa inyong suporta.