Tak-om ang liderato sa House of Representatives sa gipangayo sa nagpakabana nga mga grupo nga mga dokumento sa pagpasabot sa kapin sa 7,000 ka proyekto nga balor og ?190 bilyones nga insertions nila sa gisugyot nga ?7.2 trilyones nga budget sa 2027.
Human gitawag nga ignorante ang mga magbubuhis nga nangutana diin gikan ang insertions (mga proyekto nga wala maapil sa lista nga gisumiter ni Presidente Ferdinand Marcos Jr. ngadto sa House), nagtudlanay nang mga kongresista kon kinsay responsable sa insertions ug kinsay angayng motubag sa mga pasangil.
Gidasonan sa 35 ka labing dagkong grupo sa mga negosyante sa Sugbo ug sa Pilipinas ang pagpangayo sa People’s Budget Coalition ug ubang budget experts sa mosunod nga mga dokumento gikan sa House:
•Kumplitong lista sa mga proyekto ug mga lugar nga tukoran (hinaot sakto nang coordinates);
•Budget sa kada proyekto ug asa kuhaon ang pundo;
•Kapuslanan ug kaandam sa pagpatuman sa mga proyekto; ug
•Kinsa ang senador o kongresista o sakop sa Gabinete o local government unit (LGU) nga nisugyot sa proyekto.
Nipasalig dayon si Senate President Sherwin Gatchalian sa pagpatuman sa makiangayon nga mga demanda sa pribadong sektor. Nisaad siya sa pagtangtang sa tanang insertions sa House nga walay feasibility studies, programs of work, mga resolusyon gikan sa LGUs, ug ubang mga dokumento.
Dili hinuon ta mokumpiyansa. Samang pasalig giluwatan sa mga senador sa nangaging katuigan. Pero nakalusot ang mga binuang sa House. Gipun-an pa gani sa dugang insertions sa mga senador sa bicameral conference committee.
Bisan wala pay timaan nga mahatag sa mga kongresista ang gikinahanglan nga mga dokumento, niinsistir ang pribadong mga grupo nga kinahanglan nga masumiter na sa dili pa ang botasyon sa mga senador sa second reading sa ilang bersiyon sa budget. O labing dugay sa dili pa magsugod ang bicam.
Giawhag sab nila nga tumanon sa mga senador ug mga kongresista ang lagda sa Korte Suprema sa pagdeklarar nga unconstitutional ang mga budget sa 2024 ug 2025 ug kabahin sa 2026: Ang bicam igo lang mohapsay sa nagkasungi nga mga probisyon sa mga bersiyon sa House ug Senado; ug walay gahom sa pag-imbento og iyang kaugalingong budget.