Kon madayon ang imbestigasyon sa Senate Blue Ribbon Committee sa giingong smuggling sa duha ka Bugatti Chiron sports cars, nga nakapa-alkanse sa gobyerno og ?366 milyones sa koleksiyon sa buhis, mahibaw-an na g’yud nganong kalit nga gitaktak sa Malacañang ang Sugbuanong si Yogi Filemon Ruiz isip Customs commissioner.
Si Ruiz ang gitumbok nga kinatas-ang opisyal sa Bureau of Customs (BOC) dihang misteryusong nakasud sa Pilipinas ang duha ka Bugatti sa niaging tuig. Kon madayon ang imbestigasyon, nga mahimong labing una sa komitiba karong tuiga, dako ang kahigayonan nga ipatawag si Ruiz.
* * *
Daghang nahibung dihang gitudlo si Ruiz sa BOC niadtong Hulyo 2022, pila lang ka adlaw human nibanos si Presidente Ferdinand Marcos Jr. sa Malacañang. Mas daghang nakugang dihang gitangtang si Ruiz sa BOC niadtong Pebrero 10 sa niaging tuig.
Wa magtagad ang palasyo pagpasabot unsay atraso ni Ruiz nganong pito ra ka buwan ang lahutay pagduma sa usa sa labing kurakot nga ahensiya sa gobyerno. Si Ruiz mismo, sa daghang higayon nga nipasumbingay sa plano pagdagan pagka mayor sa Cebu City, wa maghisgot unsay nahitabo niya sa BOC.
* * *
Di hinuon si Ruiz ang direktang gilambigit sa kontrobersiya sa duha ka Bugatti. Si Yasser Abbas, direktor sa Imports and Assessment Services sa BOC, maoy gipasanginlan ni Senador Raffy Tulfo nga nitugot sa tanang nakasud nga mga sakyanan.
Kon mo-atubang sa mga senador, makatabang si Ruiz sa pagpasabot nganong ?24.7 milyones ra, imbes ?207 milyones, ang buhis nga ilang gikolekta sa BOC sa kada Bugatti gikan sa Frebel Import and Export Corp.
* * *
Ambot nganong hangtod karon, bisan sa kadaghan na sa interviews ni Ruiz sa iyang mga plano sa politika, wa pa g’yuy bisan usa ka reporter sa Sugbo nga nangahas pagpangutana sa mga sirkumstansiya sa iyang pagkatudlo ug pagkataktak sa BOC.
Ang kasayuran nga wa makuha sa media sa Sugbo, tungod sa wa paghatag og importansiya o kaikog ni Ruiz, mahimong mahisgutan atol sa pagsukitsukit nilang Tulfo ug ubang sakop sa komitiba. Ubos sa pagdumala ni Senador Pia Cayetano, nga nakahimo og kasaysayan isip labing unang babaye nga pangulo sa komitiba sukad sa pagkatukod sa Senado 106 ka tuig ang nilabay.