Pulos pagpahuway human sa kutas nga kampanya ang ilang rason paggawas sa nasud pila lang ka adlaw human sa eleksiyon: Si Bise Presidente Leni Robredo niadto sa New York niadtong Mayo 14 ug si presumptive president Ferdinand Marcos Jr. niadto sa Melbourne niadtong Mayo 16.
Kalainan: Samtang gipahibawo ni Robredo ang iyang biyahe pila ka adlaw sa wa pa molarga uban sa iyang mga anak; wa ipahibawo ni Marcos ang iyang bakasyon, nahibaw-an lang dihang nagprotestang mga Pilipinhon sa Melbourne sa gawas sa ilang apartment ug nabalita sa media sa Australia.
* * *
Managsamang para sab sa kamanghoran nilang mga anak ang mga biyahe: Si Robredo nitambong sa gradwasyon ni Jillian sa New York University; samtang si Marcos naghatod ni Vincent nga mo-eskuyla sa University of Melbourne.
Kalainan: Si Jillian ni-gradwar na sa Bachelor of Arts sa Economics and Mathematics sa hingpit nga scholarship; samtang si Vincent mao pay pagsugod. Hinaut nga di masubli ang nahitabo sa iyang amahan. Nga gigastohan ni Marcos Sr. sa buhis sa katawhan para sa luhong mga pinuy-anan, bodyguards ug parties pero way kurso nga nahuman.
* * *
Managsamang mubo rang ilang bakasyon, usa ka semana para ni Robredo ug tulo ka adlaw para ni Marcos. Kay pulos dagko ug dinalian ang mga gimbuhaton sa ilang pagbalik dinhi:
Kinahanglang matukod nang Marcos ang iyang gabinete sa di pa mobanos sa Malakanyang sa udtong tutok sa Hunyo 30; samtang
Kinahanglang hingpiton nang Robredo ang tanang panginahanglan paglusad sa kinadak-ang grupo sa mga boluntaryo sa kasaysayan sa Pilipinas, ang Angat Buhay NGO, karong Hulyo 1.
* * *
Kalainan: Samtang gawasnon ang mga Robredo nga mosuroy sa Estados Unidos, kon moduaw si Marcos Jr. mahimo siyang dakpon tungod sa pagsupak sa sugo sa korte pagbayad sa mga biktima sa diktadura ni Marcos Sr.
Laing kalainan: Samtang way laing kuyog sa biyahe ang mga Robredo, nagpakuyog ang mga Marcos og mga guwardiya. Tingali nanaganang daan sa mga protesta nga masugatan. Ang pait nga kamatuoran mao nga, sama sa panahon ni Marcos Sr., mapugwat ang mga Pilipinhon nga mas sayon ang pagprotesta batok sa kahiwian ug pangabuso sa mga Marcos sa ubang kanasuran kay sa atong kaugalingong nataran.