Abunda ang kahibulongan nga mga istorya sa 271-anyos na nga palasyo sa Malakanyang --nga naglakip sa guwardiya nga way ulo, kapre sa presidential museum, kalag ni Presidente Manuel Quezon nga nakit-an sa batan-ong Imee Marcos, ug ubang mga di ingon nato nga gikonsulta ni Ferdinand Marcos Sr. sa mga espiritista --pero way kawani ni opisyal nga nakaandam sa nahitabo niadtong Biyernes.
Ang Mayo 7, 2021 kabahin na sa kasaysayan: Gikan sa kinapusoran sa Malakanyang, sa kalanog nga nadunggan sa tanang 7,641 ka isla sa Pilipinas, niulbo ang nasudnong kakak.
***
Samtang ang pagtalaw gipaabot na sa kadaghanan tungod sa nagkabulingit nga track record sa lahap nga mga istorya sa mga nagtungkawo karon sa gahom, way nakaseguro kon magsabasaba ba o moluom ug magpalingug-lingog lang.
Ang aktuwal nga kakak nilapas sa tanang gipaabot nga mga palusot: mopauli sa Davao, motago sa pila ka adlaw, o gubat sa Mindanao (sa ako hinuong pagsuwat ini may niulbong pinusilay sa Maguindanao). Kay gawas nga nibahag ang ikog, nagpapuli pa g’yud og representante nga ang maminaw maglingulingo nang daan sa di pa gani kasugod og sulti.
***
Kadaghan na nibalibad og mga hagit si Presidente Rodrigo Duterte. Labi na sa mga giluwatan sa mortal niyang kaaway nga si kanhi senador Antonio Trillanes:
- Gilabalibaran niya ang hagit ni Trillanes niadtong Disyembre 2018 nga magpa-drug test human niangkon nga nihithit og marijuana;
- Gibalibaran niya ang hagit niadtong Agosto 2018 nga mokuha og IQ test human niya pasanginli si Trillanes nga ubos og IQ; ug
- Gisalikway niya ang hagit ni Trillanes pagpirma og bank waiver pagmatuod nga wa siyay binilyon ka pesos nga deposito.
***
Pero lahi ang kataposan niyang sibog kay siyay nanghagit. Way nagtion og armas niya niadtong gabii sa Miyerkules, Mayo 5, gawasnon ang iyang paghagit ni retired Supreme Court Justice Antonio Carpio og debate sa West Philippine Sea.
Way nakugang sa pagdawat dayon ni Carpio sa hagit. Pero wa gihapoy nakaandam sa kalanog sa kakak niadtong Biyernes nga posibleng nakapapugwat sab sa mga kalag sa Malakanyang. Maong mangahas ko og sugyot sa pag-ila sa Mayo 7 nga “National Kakak Day.” O kon ganahan ka og lunlon nga Iningles, “National White Eggs Day.”