Naghilak ang taga Olango nga nisumbong ni Padre Lucas Inoc sa kapait sa ilang kahimtang. Tungod sa kadagko sa bawod ug kusog nga habagat gikan sa bagyong Hanna, wa na silay pagkaon, way kuryente kay nahutdan og krudo ang generator sa isla, wa kapangisda ug napalta sa tibuok semana ang mga nagtrabaho sa mainland sa Opon ug sa Sugbo.
Si Padre Lucas nga nabalhin sa parokya sa San Fernando Rey sa Liloan human sa lahugay sa kaparian sa Artsidyosesis sa Sugbo nahadiin-diin og pangita og makatabang sa iyang islang natawhan.
* * *
Maayo na lang nga wa mangiyugpos si Lapu-Lapu City Mayor Ahong Chan. Gipanghinaot ni Lapu-Lapu City Disaster Risk Reduction and Management Officer Nagiel Bañacia nga nakatabang sa mga molupyo ang mosunod:
• Ang barko sa Philippine Coast Guard (PCG) nga nadestino sa Malakanyang sa Sugbo mao’y gisakyan sa mga pasaherong natanggong sa pantalan sa Angasil paingon sa isla ug sa taga isla paingon sa mainland sa pagbalik;
• Nipada ang City Hall og mga pagkaon sa isla sakay sa helikopter; ug
• Gipa-apud-apod nang 25 ka sakong bugas humay nga natigom sa mini City Hall sa Olango.
* * *
Nipasabot si Bañacia nga kay mao pa may pagsugod nila og hapsay sa sistema sa Opon pagtubag sa mga katalagman, nanghangyo lang una sila og 3,000 ka food packs gikan sa rehiyonal nga buhatan sa Department of Social Welfare and Development ug mao’y ilang gikarga sa barko sa PCG.
Nanghinaot siya nga matinuod ang pangagpas sa PAGASA nga kutob ra gahapon ang kusog nga huros sa habagat ug mogamay nang mga bawod karong adlawa aron nga luwas nang makalawig ang mga pasahero gikan ug padung sa Opon ug Olango.
* * *
Nahupay ang kabalaka ni Padre Lucas pagkahibawo sa mga hinabang. Nanghinaot siya nga sa sunod di na paabuton nga magutman una ang kabos nga mga molupyo sa Olango sa di pa padad-an og tabang.
Tingali di sama kakusganon ang mga lakang sa mga hingtungdan kay habagat ra ug di bagyo ang niigo nato. Hinaot nga bisan usa ka adlaw lang nga matanggong ang mga taga isla, magkara-kara ta og paningkamot nga mahatdan dayon sila sa labing batakan nga mga panginahanglan.