Kay nagpadayon mang kasaulogan sa Cebu Press Freedom Week ug Broadcasters Month, tugoting akong hinumdoman ang pagkahimong mayor sa sakop sa media sa Sugbo tungod lang kay natanggong sa Metro Manila atol sa pag-ulbo sa People Power Revolution niadtong 1986.
Human napukan ang diktadura ni Ferdinand Marcos, nidangop siya ni kanhi DILG secretary Nene Pimentel nga iyang gikaila dihang gipapriso ni Marcos sa Sugbo. Sa wa pang kapangayo og plite, kay nasagol man sa ubang mga aplikante, gipangutana siyang Pimentel taga diin, dayong tudlo niyang OIC mayor sa iyang lungsod sa Bohol.
***
Maayo na lang nga wa katambong ang sakop sa media sa command conference ni Presidente Duterte sa Tuguegarao City sa Cagayan atol sa pagsusi sa lapad nga kadaot sa Bagyong Ompong. Kay peligrong maoy nalingian sa presidente ug maoy natudlo nga sunod nga tagduma sa National Food Authority (NFA).
Hinaot nga mas takos niya ang nakit-an sa presidente, si Lieutenant General Rolando Joselito Bautista, hepe sa Philippine Army, nga kinahanglan pa nga moretiro sa sunod buwan una makabanos sa ahensiya nga gibasol sa krisis sa bugas humay.
***
Mahimong nabantang sa katawhan ang proseso sa presidente pagtudlo sa mga opisyal sa iyang pamunoan: Kinsa lay unang malingian. Kay kon wa pa apuraha ni Labor Secretary Bebot Bello sa pagtudlo og kasamtangang tagduma sa NFA, mahimong di makahunahuna paghulip sa katungdanang nabakante sa pagbiya sa iyang kinaham nga si Jason Aquino.
Giingnan sa presidente ang klarong nakugang nga si Bautista nga di pa siya matudlo sa Bangko Sentral ng Pilipinas. Busa sa NFA lang una.
***
Mao ba ni hinungdan nga nagkataas nang listahan sa mga tinudlo ni Presidente Duterte nga nasakpan nga di kamao, o nag-abuso sa gahom, o nangawat g’yud sa buhis sa katawhan? Kay gawas nga ang dagkong katungdanan gihimong bayad sa mga nakatabang sa iyang kampanya sa piniliay, o pasidungog sa mga ni-amen niya dihang nadestino sa Davao, gipanghatag sab diay sa una niyang mga nalingian o nahunahunaan.
Kanus-a pa kaha malingian ang katawhan nga nisamot kakabos tungod sa iyang kasaypanan sa ekonomiya? Kanus-a pa kaha mahunahunaan ang kinabag-an nga nahingawa tungod sa pinatuyangang pagpangyatak sa balaod?