Makapakugang ang testimoniya sa nangangkon nga orihinal nga sakop sa Davao Death Squad (DDS) sa pagpadayon gahapon sa imbestigasyon sa Senado sa extrajudicial killings. Abunda ang mga detalye nga iyang gipabuhagay sa giingong pagtukod ni Presidente Rodrigo Duterte sa siya pay mayor sa Davao City sa "Lambada Boys" nga may pito lang ka sakop hangtod nga gipalapdan ang kahugpongan ug nahimo nang DDS.
Si Edgar Matubato, 57 anyos, ba ang sakop sa DDS nga giingon ni Senador Leila de Lima, sa siya pay pangu sa Commission on Human Rights ug bisan dihang natudlo nang Kalihim sa Department of Justice, nga mobarug unta batok ni Duterte sa nahaunang imbestigasyon batok sa vigilante killings sa Davao?
* * *
Ang wa pagkahinayon sa iyang testimoniya sa nangaging katuigan maoy nakapahunong sa nangaging mga imbestigasyon. Mao say hinungdan nga way bisan unsa nga kaso nga napasaka batok ni Duterte bisan sa subli-subli nga panganti ni de Lima sa iyang katuigan sa CHR ug DOJ pag-apiki niya.
Maong nakapangangkon ang Malakanyang nga sukwahi sa pasangil sa United Nations (UN) High Commissioner for Human Rights nga si Zaid Hussein matinahuron si Duterte sa tawhanong mga katungod. Apan human sa testimoniya ni Matubato atubangan sa mga senador gahapon angayng mogamit ang mga tigpamaba ni Duterte og mas katuohan nga panagang.
* * *
Pipila sa makapakugang nga testimoniya ni Matubato:
• Gisugo silang Duterte, nga iyang giila nga nag-alyas og "Charlie Mike," sa pagbanhig og pagpatay nilang de Lima ug ubang mga opisyal sa CHR dihang niadto sa Davao pag-imbestigar sa mga vigilantes niadtong 2009; ug
• Si Davao City Vice Mayor Paolo Duterte ang nagpapatay sa Sugbuanong negosyante nga si Richard King niadtong 2014, ang duha ka mamumuno gipapatay sab sa kapolisan, siya si Matubato ang gipasanginlan nga responsable ug gisugo pa gyod nga itumbok si Police Superintendent Leonardo Felonia nga maoy tinuod nga mastermind sa krimen.
* * *
Sukwahi sa pangangkon ni Duterte dihang nibanos na sa Malakanyang ug nakabuylo nang iyang paghingan sa gidudahan nga mga durugista nga napatay si King niadtong Hunyo 12, 2014 tungod sa iyang kalambigitan sa ilegal nga drugas, si Matubato niingon nga personal ang atraso ni King kang Paolo: Nagkaribal sila og babayeng negosyante nga tag-iya sa usa sa mga sanga sa fast food chain sa Davao.
Gibutyag ni Matubato nga nitago siya dinhi sa Sugbo ug dayon sa Leyte uban sa iyang asawa kay nakaikyas sa pagsuway sa mga sinugo ni Duterte pagpatay niya human sa pila ka adlaw nga torture. Tungod sa kahadlok sa iyang seguridad, labi na human sa pagdaog ni Duterte pagka presidente, niangkon si Matubato nga nidangop siya sa CHR ug sa DOJ.