Kon mapatuman ang mga tugon ni Arsobispo Luis Antonio Cardinal Tagle sa mga angayng buhaton ug mga di angayng buhaton samtang nagkaduol nang piniliay, makalingkawas ang kaparian sa mga pasangil nga namolitika, nipabor sa pipila ka piliunon ug nagpahimus sa kamanggihatagon sa mga politiko.
Pipila sa gipahibawo ni Tagle nga di angayng buhaton sa mga pari: Pagmisa alang ni bisan kinsang kandidato ug partido; pagkuyog sa mga pangampanya ni bisan kinsang magpapili; pagtugot sa mass weddings nga gipasiugdahan sa mga politiko; ug pagpangayo og pabor ug hinabang gikan sa mga kandidato.
* * *
Maglisod hinuon ang kaparian sa Sugbo ug ubang bahin sa nasud sa pagtuman sa mga lagda ni Tagle sa kampanya sa lokal ug nasudnong piniliay sa Mayo 9, 2016. Gawas pa, di sila mapugos sa pagtuman sa mga sugo ni Tagle kay:
• Di sila ubos sa direktang pagduma ni Tagle kansang hurisdiksiyon kutob ra sa Artsidyosesis sa Manila, mao nga di makapanghilabot sa Artsidyosesis sa Sugbo ubos ni Arsobispo Jose Palma ni sa ubang artsidyosesis ug diyosesis nga giduma sab og mga arsobispo ug mga obispo; gawas pa
• Way police power ang Simbahang Katoliko.
* * *
Ang ka way police power maoy nakapa-inutil sa simbahan sa pagpatuman sa iyang kasugoan. Mao ni hinungdan nga hangtod karon wa pa hingpit nga mapatuman ang gibalikbalik nang sugo ni Pope Francis nga himuong yano ang pagpuyo sa mga pari ug nga alagaran nila ang labing kabos ug labing masakiton nga mga parokyano.
May mga pari sa Sugbo nga padayong nagpabaga pagkabayo sa luho nilang mga sakyanan ug pakighugoy-hugoy sa labing adunahan nga mga negosyante ug labing gamhanan nga mga politiko. May pipila man gani nga nikuwestiyon sa liderato ni Pope Francis ug nipili pag-ila sa ni-resign nga si Pope Benedict.
* * *
Apan di taphaw si Tagle. Samtang nahibawo sa iyang mga limitasyon, labaw pang nahibawo unsaon pagbuntog ang maong mga limitasyon. Kay nahibawo nga ang iyang mga lagda mapahamtang lang sa Artsidyosesis sa Manila, wa pay garantiya tumanon ba sa mga pari nga direktang ubos niya, gipili ni Tagle ang pagpahibawo sa mga lagda pinaagi sa nasudnong media. Sa ingon, makahibawo bisan ang mga pari nga di ubos sa iyang pagduma.
Labaw sa tanan, pinaagi sa pagdangop sa media gitugyan ni Tagle ang tahas sa pagpatuman sa mga lagda ngadto sa mas gamhanan nga institusyon: Ang katawhan, ang mga parokyano. Kon kontratahon ang mga pari pagmisa sa Christmas party sa mga politiko, o pagbendisyon sa ilang political headquarters o sa unang adlaw sa ilang kampanya, managana na. Kay nahibawo nang mga pari nga nahibawo nang mga parokyano nga di makaayo sa simbahan ang ilang pagpagamit sa mga politiko.