Kusganong gisalikway ni Richard Cabucos, presidente sa Metro Cebu Taxi Operators Association, ang reklamo sa taxi drivers nga gi-abusohan sila sa operators pinaagi sa pagpaburot sa ginansiya sa ilang gitukod nga Automotive-LPG stations. Matod ni Cabucos pulos bakak ang mosunod nga mga pasangil:
• Nga mas taas og hangtod P6 matag litro ang presyo sa Auto-LPG stations sa operators kay sa kasarangang gasoline stations; ug
• Nga mahimong kuwangan ang sukod sa Auto- LPG nga gitubil sa ilang taxi units.
Niinsistir si Cabucos nga susama kon di man gani mas ubos ang ilang presyo kay sa regular gasoline stations. Gani may taxi operators nga nitanyag pa og P1 nga rebate sa matag litro sa Auto-LPG.
***
Apan human nasibya ang pamahayag ni Cabucos sa Arangkada sa DYAB Abante Pa, Bisaya!, nagbaha ang masuk-anong tawag sa taxi drivers nga nihatag og dugang detalye sa panaugdaog nga ilang nahiagoman:
• Pipila ka taxi operators nitabon sa price counters sa ilang Auto-LPG stations ug makugang na lang ang mga drayber sa kataas sa presyo inig patong na sa ilang inadlaw nga abangan; ug
• Bisan ang taxi operators nga way Auto-LPG stations maoy mo-kobra sa rebate nga P3 matag litro gikan sa ilang suki nga gasoline stations pinaagi sa pagkuha sa resibo sa pagpatubil sa mga drayber.
***
Dihang gisumbong namo ang reklamo sa taxi drivers ngadto ni Regional Director Antonio Labios sa Department of Energy sa Central Visayas, mas nakugang mi sa iyang gihatag nga kasayuran:
• Wa maapil sa inspeksiyon sa DOE ang Auto-LPG stations sa taxi operators kay giisip silang igo lang nag-suplay sa panginahanglan sa ilang kaugalingong taxi units ug busa giluwatan og certificate of non-coverage;
• Maong way kasayuran ang DOE pila ang presyo ug unsa kamatinud-anon ang sukod sa Auto-LPG stations sa taxi operators; ug
• Wa pay kahimanan ang DOE karon pagsusi sa kamatinud-anon sa sukod sa Auto-LPG di lang sa mga estasyon sa taxi operators kon dili hasta sa regular gasoline stations.
***
Matod ni Labios kinahanglan nga mopasaka og pormal nga reklamo ang taxi drivers una masusi sa ilang buhatan ang Auto-LPG stations sa taxi operators. Dihang amo siyang gipangutana di pa ba igo nga sukaranan ang reklamo nga among gipadangat isip mga magbubuhis, nisaad si Labios pagpada sa iyang mga inspektor sa DOE.
Samtang nagsuwat ko ini, nanawag ang buhatan ni Labios nga nagpahibawo nga may gitakda na silang inspeksiyon. Nitanyag mi sa pagkuyog aron nga ma-dokumento ang bisan unsa nilang makaplagan. Kay nahibawo na man gyod tingali ning higayona ang taxi operators sa nag-ung-ong nga inspeksiyon sa DOE, di mi mahibung kon mokalit lang og tidlom ang presyo sa ilang Auto-LPG stations sugod karong adlawa.