Human namo og paniudto dayong Pasko sa niaging semana, ambot unsay hinungdan, nagkasabot ming mamalit og biseklita. Kay nagsugod na man og panira ang mga tindahan alang sa taas nga bakasyon hangtod sa Bag-ong Tuig, nanawag mi sa among mga higala asa makapalit og baratong mga biseklita.
Nahugno ko pagkahibawo gikan sa akong kaubanan sa trabaho, nga nagsugod na og ehersisyo matag weekend sakay sa ilang mga biseklita, nga silay nag-assemble ug nga di barato ang ilang mga sakyanan. Nisamot kapawong ang akong interes pagkahibawo nga ang usa sa labing dakong tindahan sa surplus nga mga biseklita sa amihanang Sugbo nanerado na.
***
Apan wa mabantog nga motahan dayon ang among higala nga maoy namangka og paniudto nga si Austrian Consul Julie Alegrado Vergara. Nidangop siya sa Google pagpangita sa mga numero sa telepono sa mga tindahan og biseklita. Daghang numero ang among nakit-an. Way bisan usang nitubag sa among gitawgan.
Nihukom siya nga manakay mi kuyog sa tanang mga sakop sa iyang pamilya sa hamugaway nilang sakyanan ug pagsuway pagduaw sa inilang tindahan sa mga biseklita sa North Reclamation Area sa Dakbayan sa Sugbo. Nakumbinser ming ganahan lang siyang magsuruy-suroy. Nalingaw mi sa biyahe bisan sa kahuot sa trapiko sa Pasko. Sayon ra namong natultolan ang tindahan apan, nakatag-an ka, serado.
***
Kaingon nako nga mao na toy kinutoban sa among gana sa biseklita. Maong nakugang na lang ko nga samtang nagpadayon ang among Kumbira sa Kapamilya sa ABS-CBN TV Barn uban sa suking mga tigpaminaw sa DYAB 1512 Abante Pa, Bisaya!, gitawgan ko sa akong asawa nga nangimbitar na sab si Julie nga hinayunon namo og pamalit og mga biseklita.
Human gyod dayon sa Kumbira, gikuha ko sa akong asawang si Iris sa sibyaanan. Nanawag ko sa tindahan pagseguro nga abli sila. Matod sa babaye nga nakatubag nga magpaabot sila namo apan manera na sila sa alas-3 sa hapon. Bisan usa ka oras na lay lugway, gipakuyog na sab ming Julie sa tibuok niyang pamilya pagpamalit og biseklita.
***
Labihang lipaya namo nga daghan ang gi-display nga mga biseklita sa atubangan sa tindahan. Mas nahinangop mi dihang gipasud sa higante nilang bodega nga napuno sa kaliboan ka biseklita. Hangtod nga among naamgohan nga wa mi igong panahon pagpili.
Human sa kapin sa oras, nakapili na mi og lima. Dayong bayad, nausab ang among hunahuna ug nagpili na sab og lain. Gipahinumdoman mi sa mga kawani nga may lakaw ang ilang labaw maong manera og alas-3. Ihatod nilang among mga napalit karong Lunes ug magsugod mi og biseklita karong Martes. Lipay mi sa among napalit ug nagplanong mamalit og mga sangkap ug nganlang mga biseklita. Apan wa hingpit isalikway ang kahigayonan nga magsinukmatay mi nganong wa pa masakyi dayong Bag-ong Tuig sa 2016.