Kontra gusto nang daan ang Department of Public Works and Highways pagsanong sa pag-uyon sa Department of Environment and Natural Resources sa pagputol sa pipila ka punoan sa Akasya sa Dakbayan sa Naga. Hagbay ra silang nangayo og permiso pagpamutol sa kahoy aron kapalapdan nang nasudnong highway.
Apan nabaraw ang ilang plano. Kusganong gisupak sa pipila ka lokal nga mga opisyal ang pagpamutol sa makasaysayanon nga tagsa ka tuig nang mga kahoy. Napugos na gani ang nasudnong buhatan sa DPWH pagpausab sa plano aron kapalapdan ang highway sa way paghilabot sa mga Akasya. Maong nangalisbong pangluod ang panagana sa lokal nga kadagkoan sa DPWH pagdason sa pamalihug sa DENR.
***
Wa gyod gani maggunok ang DPWH sa gitakda na untang pagpamutol sa mga kahoy dayong tapos sa niaging buwan. Nasabotan nang petsa una nagpahiku-hiko ang DPWH nga di pa sila mamutol kay wa pa silay seedlings nga ikapuli pagtanom.
Haskang lingawa tingali sa DPWH nga nagtan-aw sa DENR nga maoy nagkarakara pagtanyag nila og seedlings nga ipuli sa pamutlon nga mga Akasya. Nanimaho sang dumot ang salida sa DPWH. Kay nag-ung-ong pang kaso sa DENR batok sa DPWH ug sa kontraktor ug ni-ungot ang pag-semento sa Serging Osmeña Road tungod sa gipangawat nga dul-an sa gatos ka punoan sa kahoy.
***
Maong way nahibung nganong nagkayamukat ang pagsugod sa ilang pagpamutol sa mga punoan sa Akasya sa Naga. Klarong giumol ang plano pinaagi lang sa papel sa way pagsusi unsay aktuwal nga epekto ngadto sa trapiko. Igo lang gipasidan-an ang mga motorista ug mga pasahero pagsayo sa ilang mga lakaw. Sa pagsugod na og pamutol naklaro nga ang tibuok highway diay ang ilang tak-opan.
Di mabasol ang kaliboan ka motorista ug pasahero nga nahibung unsay nakaigo nila. Nganong wa may kalainan ang ilang pagkatanggong sa aksidente nga pagkatumba sa mga Akasya sa Balud, San Fernando ug sa Perrelos, Carcar City sa nangaging mga semana?
***
Nisugyot ang DENR nga himuon ang pagpamutol sa mga kahoy sa mga oras sa gabii nga di kaayo mahasol ang trapiko. Apan kusganong nibalibad ang kadagkoan sa DPWH. Gisalikway sab ang laing sugyot nga i-atol nila og weekend kanus-a di ingon ana kadaghan ang mga motorista ug mga pasahero nga mahasol.
Ambot kon unsay mas dakong hinungdan sa paugat sa DPWH: Ang katapolan ba pagtrabaho sa gabii ug sa weekend?; o gi-personal na ba ang ilang panagsungi uban sa DENR? Hinaot nga way sukaranan ang pagduda nga ang publiko maoy napahimungtan sa ilang away. Gawas sa pagkabara sa trapiko, nabantang ang laing timaan sa wa nila pagsinabtanay--way crowd control sa mga pasahero nga nagbaktas na lang ni ambulansiya alang sa mga nanga-angol.