Mas nindot bitaw g'yud unta nga ang mga karsada dili gayud parkingan og mga sakyanan. Apan unsaon, kuwang man ang mga pay parking areas? Asa man mo-parking ang mga motorista?
Mao kini ang hinungdan nga kaniadto nakahuna-huna ang mga opisyal sa dakbayan sa Sugbo nga pabayron na ang mga motorista nga mo-parking daplin sa karsada.
Kini maoy usa sa gikuhaan og dako nga kita sa City Traffic Operations Management kay subra sa P50 milyones ang ilang makolekta sa usa ka tuig gikan sa bayad sa mga tag-iya og sakyanan.
Nakakuwarta tuod ang CITOM gikan sa bayad sa mga motorista nga mo-parking daplin sa karsada apan nakamugna kini og grabe nga kahuot sa atong kadalanan ug problema sa trapiko.
Pabor ko niini'ng nahuna-hunaan ni CITOM Chairman Ruben Almendras kay kun mahalan ang mga motorista sa 'tag P40 nga bayad matag oras, hayan nga dili na sila moparada daplin sa karsada.
Tingali mangita na sila og mga pribado nga pay parking areas nga bobarato ang bayranan. Ang uban nga pay parking area 'tag P15 ra man ang bayad sa usa ka oras nga pag-parking.
Apan samtang posible nga monihit na unya ang mga sakyanan nga mag-parking sa karsada kun himuon na nga P40 ang parking fee sa mata'g oras nga pag-parking, angay'ng sulbaron usab sa CITOM kining mga delivery truck nga anha mag-parking.
Alang kanako, bisan og mobayad pa kini sila og 'tag P40 ang oras daku kaayo ang kahasol nila sa publiko. Sama ani'ng gihimo sa mga delivery truck nga anha mag-parking sa dalan V. Gullas atubangan sa Colonade ug ubang balay-patigayon.
Pagkasamok gayud sa mao nga lugar. Ngano nga dili man nila itumong ang pag-deliver sa ilang mga produkto panahon sa gabii nga menos na ang mga moagi nga sakyanan?
Kini nga punto maoy angay unta hinuktokan sa mga konsehal sa dakbayan kun nagtinguha sila nga mohapsay ang atong kadalanan. Apan pastilan, ang atong mga road law enforcers dili gayud sinsero sa pagpanakop sa mga masalaypon.
Kaniadto ra nga daghan kaayo ang nagreklamo kabahin sa mga sakyanan niana'ng Vic Enterprises diha sa Barangay Mabolo nga anha sa karsada mag-parking, apan gipangdakop ba gud sa mga enforcers?
Makapaduda kaayo nga basin nagdawatan ang mga enforcers og binuwan nga suborno gikan sa tag-iya sa mao nga mga sakyanan aron dili pangdakpon ang ila nga mga drayber.
Dili ba maayo nga ipasusi nato kini Sir Rafael Christopher Yap?
* * *
Dili na g'yud karon katiaw-tiawan ang panahon kay kada adlaw na lang g'yud nga adunay gipatay pinaagi sa pagdunggab ug pagpusil. Sa laktod peligroso na kaayo ang kahimtang sa katawhan.
Unya, kadto'ng mga buotan nga mga tawo nga gusto'ng manalipod sa kaugalingon kay dili man gayud masaligan nga maprotehean kita kanunay sa kapolisan, lisud-lisuron sa kapolisan.
Maayo kaha na? Kun mopalisensya kita og armas kuti-kutihon? Maayo unta kadto kun giestrikto ang paghupot og armas sa mga tarong nga sibilyan, unya paspas ang pagpanakop sa mga nagtinil og armas nga mga kriminal.
Wala man 'sab nila kini himoa sa kapolisan. Kun aduna man gani pagpanakop sa mga nagdala og armas nga walay lisensya kana sulagma lang g'yud kaayo.
Mao kana ang hinungdan nga mata'g adlaw mabasa ninyo dinhi sa Banat News ang mga patay.