Dumaguete City, Negros Oriental -- Tam-is ang pahiyom sa mga tinun-an sa edukasyon nga makapahimus sa Kapamilya Scholarship Program. Mga tinun-an sila sa Negros Oriental State University. Kabahin sila sa unang hugpong sa mga tinun-an nga tabangan sa ABS-CBN Foundation ug ABS-CBN Central VIsayas sa pagtiwas sa ilang pagtuon.
Nakapili na sab mi og mga tinun-an sa edukasyon sa Cebu Technological University. Magpili pa mi sa mosunod nga mga adlaw sa mga tinun-an nga gi-nominate sa Bohol State University sa Tagbilaran City ug sa Cebu Normal University sa Dakbayan sa Sugbo. Nanghinaot mi nga mahingpit nang ilang pagpahimus sa scholarship program sa di pa magsugod ang klase karong Hunyo.
***
Gilusad ang scholarship program aron pagdason sa pasiunang tabang nga naapud-apod sa Kapamilya Relief Campaign alang sa mga dapit nga naigo sa sunudsunod nga katalagman: Ang Negros Oriental nga unang naigo sa kusog nga linog; ang Bohol nga naigo sa mas kusog nga linog; ug ang Sugbo nga naigo sa duha ka linog ug sa bagyong Yolanda.
Nakatigom mi og igong pundo gikan sa manggihatagon nga mga Sugbuanon ug mga Bisaya nga human sa pag-apud-apod sa hinabang nga mga pagkaon ug mga sangkap sa panimay nakahukom mi sa pagtanyag og mas malungtaron nga tabang alang sa mga biktima ug sa ilang kabataan.
***
Nganong mga tinun-an sa edukasyon ang among napilian nga tabangan? Kay sila ang mag-umol sa umaabot nga kaliwatan. Sila ang labing makatudlo sa mga bata unsaon paglikay ang atong kasaypanan nga nisangpot sa bangis nga katalagman.
Silang umaabot nga mga magtutudlo ang among giisip nga kaabag sa pagpatuman sa dugang mga proyekto pag-agak sa labing tabanganan, paghaw-as sa labing nagkalisudlisod ug pag-abot sa mga napasagdan sa labing hilit nga mga bahin sa Kabisay-an ug sa nasud. Uban sa ABS-CBN Foundation scholars sa ubang bahin sa Pilipinas nga naigo sab sa katalagman mahimo silang kabahin sa nasudnong katilingban sa umaabot nga mga pangu sa nasud ug sa katawhan.
***
Libre ang ilang matrikula ug may binuwan silang allowance nga makatabang sa ubang bayranan sa eskuylahan. Hinaot nga makatampo sab sa inadlawng gastohan sa nagkalisudlisod nilang mga ginikanan. Labaw sa tanan hinaot nga makaangkon og igong kadasig ug determinasyon nga makalampos sa ilang pagtuon.
Bisan mga tinun-an pa mahimo na silang kabahin sa umaabot namong mga proyekto pagtabang sa mga molupyo sa Sugbo ug Central Visayas. Amo silang tigumon matag karon ug unya aron nga magsayranay sa ilang kasinatian ug magkahiusa sa ilang mga pangandoy bisan managlahi ang ilang mga eskuylahan ug mga pinuy-anan. Unang hugpong pa lang sila dinhi sa Sugbo ug sa Kabisay-an. Masaligon mi nga madugangan pa sa umaabot nga mga tuig tingtungha.
***
Email: leo_lastimosa@abs-cbn.com