Bisan di takos, palihug tuguti nga mosugyot ko sa mosunod nga mga sumbanan paghusay sa panagsungi tali sa mga magduduwa sa football sa Alcoy ug Ateneo de Cebu:
•Angayng ipatigbabaw sa bisan unsang sabutsabot ug kauyonan nga makab-ot ang kaayuhan sa mga bata (mahimo ba nga ipadaplin lang una ang garbo sa mga dagko?);
•Angayng buwagon ang pagtuki sa pagkaangol sa batang mga atleta tungod sa duwa gikan sa pagkaangol nga namugna sa pag-apil sa mga way labot sa duwa; ug
•Angayng palambuon ang nagkalapad nga gugma sa mga Sugbuanon sa football ug di tungluhon hangtod sa hangtod ang pipila nga nasipyat sa pagbuling-buling ini.
***
Wa koy tuyo sa pagpagamay sa pagkaangol sa batang mga atleta: Usa nila diriyot mamatay, may nasamdan sa ulo, may nawad-an sa panimuot ug may pipila nga seryusong nabun-og. Angay silang hatagan og hustisya. Di makiangayon ang bisan unsang kasabotan nga molaktaw ug mopaka way bili sa daotang nahitabo nila.
Angayng tahuron ang katungod sa mga ginikanan sa naangol nga mga atleta pagpangita og hustisya sa gidangatan sa ilang mga anak. Gitugotan nila ang mga bata sa pagduwa aron mapalambo ang ilang katakos ug disiplina, di aron ilawog sa bisan unsang kakuyaw nga makahudlat na sa ilang kaluwas ug kinabuhi.
***
Kasagaran way kasong mapasaka kon naangol ang mga atleta tungod sa duwa. May mga lagda hinuon nga mosilot sa mga responsable. Agad sa kagrabe sa kalapasan, mahimong tawgan og foul o palagputon gyod sa duwa ang sad-an nga kaatbang. Mas hinan-aw ko og NBA busa pasayloa nga mao ni akong mga pananglitan:
•Bisan sa pagkabuak sa ilong ni Lebron James sa Miami Heat, wa tawgi og foul si Serge Ibaka sa Oklahoma City Thunder kay giisip nga aksidente ang pagsiwil sa iyang siko, gihatagan lang si Lebron ug free throw; apan
•Si Latrell Sprewell gisuspenso og 68 ka duwa sa NBA tungod sa pagtuok sa iyang coach sa Golden State Warriors.
***
Lahi ang lagda alang sa mga dagko nga way labot sa duwa nga nanghilabot sa batang mga atleta. Gawas sa pag-ban nila sa umaabot nga mga duwa, mahimong pahamtangan og mas bug-at nga silot isip mas kusganong pasidaan aron nga di na masubli ang kalapasan.
Apan niay laing angay nga timan-an. Sa way pagkuwestiyon sa kaligdong sa mga hukmanan, hasol ang kaso. Kon may mga kaso man nga mapasaka tungod sa karambola sa football, di sila mahusay ugma dayon. Ni sa sunod tuig. Mas dakong kalbaryo alang sa mga bata ang pagsud-gawas sa mga hukmanan sa mosunod nga katuigan. Ang paglikay nga masang-at ang kontrobersiya ngadto sa korte makaayo alang sa tanang hingtungdan. Labi na sa mga bata.
***
Email: leo_lastimosa@abs-cbn.com