Malipayon kaayo kong nitaho sa daghang kahigayonan sa trabaho sa Trinidad and Tobago, sa Czech Republic ug sa Dubai sa "Arangkada" sa DYAB Abante Pa, Bisaya! Hangtod nga gipasidan-an ko ni Direktor Evelia Durato sa Philippine Overseas Employment Administration (POEA) sa Kabisay-an nga mahimong pahimuslan ang kasayuran sa mapahimuslanon nga illegal recruiters.
Wa pay kasayuran sa bag-ong kahigayonan alang sa Overseas Filipino Workers (OFWs) ang POEA ug ang Department of Labor and Employment (DOLE). Nga mao ray makahatag og pagtugot sa langyaw nga employers ug pribadong recruitment agencies pagsugod na pagpanguha og OFWs. Nabalaka si Durato nga may mga tawo nga mokabayo sa balita sa way pagpaabot sa permiso sa POEA.
***
Ang tinguha sa Trinidad and Tobago pagkuha og dugang mga doktor, nurses, radiologists, pharmacists, medical technologists ug ubang medical workers gipahibawo nilang Philippine Ambassador to the United States Jose Cuisia Jr. ug Trinidad and Tobago President Thomas Aquinas Carmona.
Tungod sa burukrasya, ang kauyonan tali nilang Cuisia ug Carmona maabtan pa og pila ka adlaw o semana o buwan sa di pa mokanaog ngadto sa DOLE ug POEA. Ang haw-ang gikan sa pahibawo nilang Cuisia ug Carmona hangtod sa pagpatuman sa kauyonan maoy gikahadlokan ni Durato, pinasikad sa iyang kasinatian, nga piyestahan sa mga mangingilad nga manguwarta sa mga aplikante nga desperadong makagawas sa nasud.
***
Si Philippine Ambassador to Prague Victoriano Lecaros ug pribadong kompaniya sa Czech Republic mao say nagpahibawo sa kahigayonan sa trabaho alang sa IT professionals nga mga biktima sa bagyong Yolanda sa amihanang Sugbo ug silangang Kabisay-an. Maong mas unang nahibawo ang media kay sa DOLE ug POEA sa maayong balita alang sa OFWs.
Nga mao say nahitabo sa pahibawo ni Secretary General Joel Villanueva sa Technical Education and Skills Development Authority (TESDA) nga nagkinahanglan ang Dubai og 4,200 ka babaye nga skilled workers alang sa electrical installation ug maintenance, plumbing, refrigeration ug airconditioning uban ang suholan nga hangtod sa P34,000 matag buwan.
***
Samang di kapugngan silang Cuisia, Carmona, Lecaros ug Villanueva sa pagsangyaw sa maayong balita, hinaot nga di sab pakasad-on ang mga sakop sa media nga mas unang nahibawo ang OFWs sa bakanteng mga trabaho sa nagkalainlaing kanasuran kay sa mga buhatan nga gitahasan pagpanalipod sa ilang mga interes.
Ang mahimo tingali sa DOLE, POEA, Department of Foreign Affairs (DFA) ug ubang mga buhatan sa gobyerno mao ang paglaslas sa tambok nila nga burukrasya. Aron nga ang bag-ong kahigayonan sa trabaho mas sayo nga mapahibawo ug mapasabot ngadto sa publiko ug maaplayan sa OFWs. Sa way pagsakripisyo sa batakan nilang katungod alang sa makiangayon nga suholan ug mga benepisyo ug tawhanon nga kahimtang sa panrabaho.
***
Email: leo_lastimosa@abs-cbn.com